ფრანგი ჩოგბურთელი ჟილ სიმონი, რომელიც ამჟამად მსოფლიოს 68-ე ჩოგანია სეზონს აჩერებს. 36 წლის ვეტერანი მეჩოგნე ალბათ კორტზე მინიმუმ როლან გაროსამდე აღარ გამოჩნდება, თუმცა არც ის არის გამორიცხული მან სათიხნარო დიდი სლემიც გამოტოვოს.
„ტურნირებზე ასპარეზობას ვწყვეტ. აღარ მაქვს სურვილი და შემართება ქვეყნიდან ქვეყანაში ვიარო და სხვადასხვა შეჯიბრებებზე ასეთ პირობებში ვითამაშო. ეს ყოველივე ჩემზე ფსიქოლოგიურად მოქმედებს.
ამიტომაც, სამწუხაროდ იძულებითი პაუზის აღება გადავწყვიტე. იმედია, საბრძოლო განწყობა მალე დამიბრუნდება“ – ამბობს ჟილ სიმონი.
ფრანგმა ჩოგბურთელმა პროფესიონალური კარიერა 2002 წელს დაიწყო და დღემდე ჯამში 14 ტურნირი აქვს მოგებული. ჟილ სიმონმა რეიტინგში საუკეთესო მაჩვენებელი 2009 წელს დააფიქსირა, როდესაც მსოფლიოს მე-6 ჩოგანი იყო.
