ეროვნული ლიგის მეათე ტური ქობულეთის „შუქურას“ და გორის „დილას“ დაპირისპირებით გაიხსნა. ზღვისპირელებმა მეტოქეს ზესტაფონში უმასპინძლეს და მატჩიც ფრედ – 1:1 დასრულდა.
სამართლიანობა მოითხოვს აღინიშნოს, რომ თუ ვინმე იმსახურებდა გამარჯვებას, უპირველესად ქობულეთელები. გიორგი შაშიაშვილის გუნდმა მეორე ტაიმის დასაწყისში, კერძოდ კი 55-ე წუთზე ანგარიშიც გახსნა. გორელთა შეუთანხმებელი ქმედებით მიხეილ სარდალიშვილმა ისარგებლა და ლუკა გუგეშაშვილს მარჯვენა დაბალ კუთხეში აუღებელი დაურტყა.
სტუმრებმა გათანაბრება 75-ე წუთზე შეძლეს. მეტოქის საჯარიმოში რევაზ ჭიტეიშვილმა ოსტატურად ითამაშა და ქობულეთელებიც დაამწუხრა.
მსაჯის მიერ დამატებულ წუთებზე კი „შუქურამ“ ხელიდან გამარჯვების დიდებული შანსი გაუშვა. ჩელებაძე მეკარესთან პირისპირ დარჩა, თუმცა მისი დარტყმული ძელს მოხვდა.
ზღვისპირელები აგერ უკვე ზედიზედ მესამე მატჩია არ აგებენ და სატურნირო ცხრილშიც 13 ქულით მე-6 პოზიციაზე არიან. რაც შეეხება „დილას“, გორელები 18 ქულით მე-10 ადგილზე იმყოფებიან.
