საქართველოს ეროვნული ნაკრები, მსოფლიოს 2022 წლის ჩემპიონატის შესარჩევი ეტაპის მესამე ტურის მატჩს, 31 მარტს სალონიკში საბერძნეთის წინააღმდეგ გამართავს.
ჯვაროსნები ბუნებრივია უკვე დანიშნულების ადგილზე არიან და ამ უმნიშვნელოვანესი მატჩისთვის ემზადებიან.
საქართველოს ნაკრების მწვრთნელმა ვილი სანიოლიმ მატჩისწინა პრესკონფერენციაზე რთული დაპირისპირება იწინასწარმეტყველა.
“ვფიქრობ, რომ ესპანეთისა და შვედეთის წინააღმდეგ კარგი თამაში ვაჩვენეთ, თუმცა ქულების მოსაპოვებლად ეს საკმარისი არ აღმოჩნდა. ახლა კი, ყველაზე მნიშვნელოვანია, რომ მუშაობა გავაგრძელოთ და იგივე დისციპლინით ვითამაშოთ, როგორც ეს გასულ მატჩებში გავაკეთეთ.
ჩვენს თამაშში ბევრი პოზიტიური ნიშანი დავინახე. ფიფას რეგულაციებიდან გამომდინარე საკვალიფიკაციო ეტაპი სამი მატჩით დავიწყეთ, საიდანაც ორი შეხვედრის გამართვა სტუმრად გვიწევს.
ხვალინდელ მატჩში საბერძნეთს დავუპირისპირდებით, რომელმაც ესპანეთთან პირველ ტურში გამართული შეხვედრით თავდაჯერება მოიპოვა. მსურს, მათ ეს შედეგი მივულოცო, რადგან ესპანეთის წინააღმდეგ ქულის აღება ადვილი არ არის. საბერძნეთის წინააღმდეგ რთული შეხვედრა გველის, მაგრამ ასეთივე რთული მატჩი ექნება ჩვენს მეტოქეს.” – აღნიშნა საქართველოს ნაკრების ფრანგმა მთავარმა მწვრთნელმა.
