ნაციონალურ საკალათბურთო ასოციაციაში მორიგი მატჩი ჩაატარა გოგა ბითაძემ. ქართველი ცენტრის გუნდი საკუთარ მოედანზე „ნიუ იორკ ნიქსს“ შეხვდა და დამაჯერებლად, 111:98 დაამარცხა.
გოგამ მოედანზე არასრული 10 წუთი გაატარა და მცირე დროის მიუხედავად, ინდიანას გამარჯვებაში მნიშვნელოვანი როლი ითამაშა. ქართველმა ცენტრმა 8 ქულა, 3 მოხსნა და 1 ჩაჭრა მოაგროვა. მეოთხე მეოთხედში კი შეტევაში წასულ დერეკ როუზს ბურთი წაართვა და საპასუხო შეტევაში მარტივი ორი ქულა მოიპოვა, რამაც ინდიანელთა უპირატესობა კიდევ უფრო გაამყარა.
შეხვედრის საუკეთესო კალათბურთელი მაილს ტერნერი გახდა, რომელმაც 25 ქულა და 13 მოხსნა დააფიქსირა.
„ინდიანა პეისერსი“ მომდევნო შეხვედრას 6 ნოემბერს, „პორტლენდ ტლეირ ბლაზერსის“ წინააღმდეგ გამართავს.
