იტალიის ჩემპიონატის მიმდინარე სეზონში „სამპდორიამ“ ბოლო ტურში უკვე გავარდნილი „პარმა“ მიიღო და 3:0 გაანადგურა.
ამ ამბავს დიდ ყურადღებას ალბათ არავინ მიაქცევდა რომ არა ერთი მნიშვნელოვანი გარემოება. გენუური გუნდის ვეტერანმა ფორვარდმა ფაბიო კვალიარელამ სერია ა-ში მე-500 მატჩი გამართა.
ფაბიო კვალიარელა სასტარტო შემადგენლობაში იყო და მე-20 წუთზე ანგარიშიც გახსნა. 38 წლის შემტევისთვის, „პარმას“ კარში გატანილი გოლი 500 მატჩში 117-ე გამოდგა.
ფაბიო კვალიალერამ საფეხბურთო კარიერა 2000 წელს „ტორინოში“ დაიწყო, როდესაც ის 17 წლის იყო. პირველი გოლი იტალიელმა თავდამსხმელმა სერია ა-ში 2005 წელს „ტრევიზოს“ კარში გაიტანა.
კვალიარელამ მთელი საფეხბურთო კარიერა იტალიაში გაატარა. „ტორინოს“ გარდა, სხვადასხვა დროს ის „ასკოლიში“, „უდინეზეში“, „ნაპოლიში“ და „იუვენტუსში“ თამაშობდა. ახლა კი როგორც უკვე ავღნიშნეთ „სამპდორიას“ ღირსებას იცავს.
