ევროპის სუპერლიგის პროექტი ჩაიშალა. ყოველშემთხვევაში ამ ეტაპზე კრახი განიცადა და როგორი იქნება მისი მომავალი ბუნდოვანია.
ამასობაში, ინგლისში აქტუალური გახდა პრემიერლიგის რეფორმების საკითხი. არაერთი პოპულარული ბრიტანული გამოცემა და მათ შორის ყველაზე ავტორიტეტული Sun-ი იუწყება, რომ ლიგის ბობოლა გუნდებს სიახლის შემოტანა სურთ.
საუბარია, ბრიტანული სუპერლიგის შექმნაზე, რომელშიც გლაზგოური გუნდები „რეინჯერსი“ და „სელტიკი“ იქნებიან მოწვეულნი. შოტლანდიური კლუბების ინგლისის ჩემპიონატში თამაშზე რამდენიმე წლის წინაც იყო საუბარი. ინგლისური მედიის თქმით, ევროპის სუპერლიგის პროექტისგან განსხვავებით, ამ წამოწყებას და იდეას ფიფა-უეფას მხრიდან სრული მხარდაჭერა ექნება.
„სუპერლიგის ბედი არ მაინტერესებს. ჩაიშლება თუ არა ის პროექტი არ ვიცი და მნიშვნელობაც არ აქვს, მაგრამ ის კი ნათელია, რომ ინგლისის პრემიერლიგას ახალი სისხლი და განახლება სჭირდება. რაღაც აუცილებლად უნდა შეიცვალოს და გაუმჯობესდეს“ – ამბობს ერთ-ერთი ინგლისური გუნდის ხელმძღვანელი.
ნიშანდობლივია, რომ ინგლისის პრემიერლიგაში გადაბარგების წინააღმდეგნი არც თავად „რეინჯერსი“ და „სელტიკი“ არიან.
