თბილისის „დინამოს“ წყალბურთელებს ისტორიის დაწერამდე სულ ცოტა დააკლდა. თავისთავად, უკვე ის ფაქტი, რომ ქართული გუნდი ჩემპიონთა ლიგის ჯგუფურ ეტაპზე ასპარეზობს უდავოდ დიდი მიღწევაა, თუმცა მეტის გამოდნობაც შეიძლებოდა.
ბუდაპეშტში მიმდინარე ე.წ. „ბაბლის“ სისტემის დასკვნითი ეტაპი, „დინამომ“ გამარჯვებით კი დაიწყო, თუმცა მონტენეგროულ „იადრანს“, გერმანული „ვასპო ჰანოვერი“ ვეღარ მიაყოლა, არადა ამის იდეალური შანსი კი ჰქონდა.
მატჩს სატურნირო თვალსაზრისით დიდი დატვირთვა ჰქონდა. გამარჯვებული ჯგუფში მეოთხე ადგილს იკავებდა და შესაბამისად საუკეთესო 8 გუნდშიც ხვდებოდა, რაც იმას ნიშნავდა, რომ 3-5 ივნისს, ბელგრადში ფინალურ ეტაპზე ითამაშებდა.
„დინამოს“ და „ვასპო ჰანოვერის“ დაპირისპირება მოლოდინისამებრ ძალზედ დაძაბული გამოდგა. ორივე გუნდის წყალბურთელები მატჩის მნიშვნელობას კარგად ათვითცნობიერებდნენ. „დინამომ“ თითქოს გარდამტეხ უპირატესობას მესამე პერიოდში მიაღწია, როდესაც მეტოქეს სოლიდური სხვაობით გაექცა და 6:3 დაწინაურდა. გამარჯვებამდე და სასწაულამდეც სულ ცოტა რჩებოდა. საჭირო იყო ბოლო პერიოდის ყურადღებით და სათანადო დონეზე ჩატარება.
სამწუხაროდ, თბილისის „დინამომ“ გერმანელთა წნეხს ვერ გაუძლო და მეოთხე პერიოდი პირწმინდად დათმო. საბოლოოდ „ვასპო ჰანოვერმა“ 7:6 იმარჯვა და ფინალური ეტაპის საგზურიც თავად დაიბევა.
ჯგუფური ეტაპის ბოლო მატჩს „დინამო“ 22 აპრილს მასპინძელ „ფერენცვაროშთან“ გამართავს.
