9 წლიანი პაუზის შემდეგ არისტოკრატები ისევ ჩემპიონთა ლიგის ფინალში არიან. ლონდონის „ჩელსიმ“ მადრიდის „რეალს“ განმეორებით ნახევარფინალურ მატჩში აუღელვებლად და აკადემიურ სტილში 2:0 აჯობა, საერთო ჯამში კი 3:1 დაამარცხა.
ბუნებრივია, შედეგით კმაყოფილია „ჩელსის“ მთავარი მწვრთნელი ტომას ტუხელი, რომლის ხელშიც ლონდონელები მართლაც განსხვავებულად ათამაშდნენ და ფინალშიც დამსახურებულად გავიდნენ.
„ბედნიერი და ამაყი ვარ. ჩვენ ეს შევძელით. ვფიქრობ, ფინალში გასვლა დავიმსახურეთ. რეალი ბურთს აკონტროლებდა, რაც მუდამ ტონუსში და ფხიზლად ყოფნას გვაიძულებდა.
როდესაც შეტევაზე გადავდიოდით მეტოქის კართან მყისვე ხიფათს ვქმნიდით, გოლმა კი დაგვამშვიდა და მეტად თავდაჯერებული გაგვხადა.
ვულოცავ პირველ რიგში ჩვენ ერთგულ გულშემატკივრებს და შემდეგ მთლიანად გუნდს. ეს არაჩვეულებრივი შეგრძნებაა“ – თქვა ტომას ტუხელმა მატჩის შემდეგ.
