სტოქჰოლმში მიმდინარე მსოფლიო ჩემპიონატზე ფიგურულ ციგურაობაში დღეს შეჯიბრება მამაკაცთა მოკლე პროგრამაში გაიმართა, სადაც 33 სპორტმენს შორის მორის ყვითელაშვილიც მონაწილეობდა.
ჩემპიონატის პირველ დღეს, ალინა ურუშაძის მსგავსად, რომელმაც პროგრამა მინიმუმი შეასრულა და თავისუფალ პროგრამაში ასპარეზობის უფლება მოიპოვა, მორის ყვითელაშვილმაც ეს ამოცანა წარმატებით გადაჭრა.
26 წლის ქართველი მოციგურავის გამოსვლაში გარკვეული ხარვეზები შეინიშნებოდა, რაც მსაჯებსაც არ გამოჰპარვიათ და შედარებით დაბალი – 74,66 ქულა მიანიჭეს, თუმცა ეს მაჩვენებელი მაინც საკმარისი გამოდგა, რათა მორისმა მსოფლიო ჩემპიონატზე გამოსვლა და რაც მთავარია პეკინის ოლიმპიური თამაშების ლიცენზიებისთვის ბრძოლა განაგრძოს. მორის ყვითელაშვილმა მოკლე პროგრამაში საბოლოოდ 21-ე ადგილი დაიკავა.
შეგახსენებთ, შვედეთის დედაქალაქში მიმდინარე მსოფლიო ჩემპიონატი მნიშვნელოვანი იმითაც არის, რომ იქ სწორედ 2022 წლის ზამთრის ოლიმპიადის ლიცენზიები თამაშდება.
26 მარტს, სტოქჰოლმის ყინულზე კვლავ ქალი ფიგურულად მოციგურავეები გავლენ, რომლებიც თავისუფალ პროგრამაში იასპარეზებენ. მათ შორის იქნება ალინა ურიშაძეც.
