მოახლოებულ როლან გაროსამდე იდეალური განწყობა შეიქმნა სტეფანოს ციციპასმა. ბერძენმა ჩოგბურთელმა ლიონის 250-იანი კატეგორიის საგრუნტო ტურნირი მოიგო, რომლის საპრიზო ფონდიც 481 ათასი ევრო გახლდათ.
ლიონის პრესტიჟული ტურნირის მოქმედი ჩემპიონი ფრანგი ბენუა პერი გახლდათ, თუმცა ამჯერად მან თავი ვერაფრით გამოიჩინა.
ტურნირზე პირველ ნომრად დომინიკ ტიმი იყო განთესილი, მაგრამ ავსტრიელი ჩოგბურთელი შეჯიბრს ნაადრევად გამოეთიშა. სამაგიეროდ იყოჩაღა მეორე განთესვის მქონე ციციპასმა.
სტეფანოსი ფინალამდე ერთი ამოსუნთქვით მივიდა, იქ კი კამერონ ნორის წინააღმდეგობა უნდა დაეძლია. ბრიტანელი ჩოგბურთელი ფავორიტად ნამდვილად არ მიიჩნეოდა და საბოლოოდ ასეც მოხდა. სტეფანოს ციციპასმა მორიგი ტიტულის მოგებას საათზე ოდნავ მეტი მოანდომა – 6:3, 6:3.
ამრიგად, ბერძენი ჩოგბურთელი საფრანგეთის ღია პირველობას მშვენიერ ხასიათზე და ამაღლებული განწყობით ხვდება.
