ჩემპიონთა ლიგის მერვედფინალში ტურნირიდან „იუვენტუსის“ გამოგდების შემდეგ, როგორც ჩანს „პორტუ“ მეორე სენსაციას ვეღარ მოახდენს და ევროპის ყველაზე პრესტიჟულ საკლუბო შეჯიბრს 1/4 ფინალიდან გამოეთიშება.
ყოველშემთხვევაში „ჩელსისთან“ პირველი დაპირისპირების შედეგად დაფიქსირებული ანგარიში ამის თქმის საფუძველს გვაძლევს. პორტუგალიურმა გუნდმა, ლონდონელებთან ნომინალური მასპინძლის რანგში 0:2 წააგო.
განმეორებითი მატჩი ისევ სევილიაში იქნება, თუმცა არა გვგონია ეს „პორტუს“ დიდად დამშვიდების საბაბს აძლევდეს. არისტოკრატებთან ორბურთიანი ჩამორჩენის აღმოფხვრა მარტივი საქმე არ იქნება.
ნირწამხდარი ჩანდა „პორტუს“ მთავარი მწვრთნელი სერჟიო კონსეისაოც.
„ცუდად არ გვითამაშია და არაერთი საგოლე მომენტიც შევქმენით, მაგრამ გატანა ვერ შევძელით. შედეგად კი ისე მოხდა, რომ მეტოქემ ორი გაგვიტანა. ბუნებრივია, კმაყოფილი ვერ ვიქნები.
ჩელსი საკმაოდ ძლიერი გუნდია. მათ სათადარიგოთა სკამზეც არაერთი მაღალი დონის ფეხბურთელი ჰყავთ. ჩვენ უკვე ჩემპიონთა ლიგის ძალიან მნიშვნელოვან ეტაპზე ვართ. მოდით ვიოცნებოთ, რატომაც არა?
ვფიქობ, დღეს მეტოქეზე უკეთ გამოვიყურებოდით, მაგრამ ეს ტაბლოზე ვერ ავსახეთ. მორალური გამარჯვება არ არსებობს“.
