ევრო 2020-ზე განაცხადს მიღმა დარჩენის შემდეგ, მადრიდის „რეალის“ და ესპანეთის ნაკრების კაპიტანმა, სერხიო რამოსმა პირველი კომენტარი სოციალურ ქსელში გააკეთა.
35 წლის ფეხბურთელმა საკუთარ Facebook-გვერდზე სპეციალური განცხადება გაავრცელა.
„რამდენიმე თვიანი შრომის და საკმაოდ რთული სეზონის შემდეგ მოახლოვდა ევროპის ჩემპიონატიც. ყოველდღიურად თავდაუზოგავად ვშრომობდი, სულით და გულით ვიბრძოდი, რომ „რეალთან“ და ეროვნულ ნაკრებთან ერთად წარმატებას მიმეღწია.
100%-ით ვიხარჯებოდი, მაგრამ ზოგჯერ ყველაფერი ისე არ ხდება როგორც გინდა. ძალიან მწყდება გული, რომ ესპანეთის ნაკრებს ვერ დავეხმარები. ახლა უმჯობესია დავისვენო, სრულად გამოვჯანმრთელდე და მომავალ სეზონში უფრო ძლიერი დავბრუნდე.
ესპანეთის ნაკრებში ჩემს თითოეულ თანაგუნდელს წარმატებას ვუსურვებ და ვიმედოვნებ, რომ ევროპის ჩემპიონატზე წარმატებას მიაღწევენ, მე კი სახლიდან ვიქნები ერთი უბრალო გულშემატკივარი“, – წერს რამოსი.
შეგახსენებთ, რომ ესპანეთის ნაკრების მთავარმა მწვრთნელმა, ლუის ენრიკემ დღეს ევრო 2020-სთვის ესპანეთის ნაკრების შემადგენლობა დაასახელა, სადაც მადრიდის „რეალის“ ვერცერთი ფეხბურთელი ვერ მოხვდა.
