ევრობასკეტ 2022-ის შესარჩევი ეტაპის E ჯგუფის მეხუთე მატჩში, საქართველოს ნაკრები სერბეთის ეროვნულ გუნდს მასპინძლობს.
მატჩი ჩვენი გუნდისთვის ძალიან ცუდად დაიწყო და მეტოქე 2:11 გაგვექცა, თუმცა ილიას ზუროსმა დროული წუთშესვენება აითო და კონერ ფრენკამპის ლიდერობით სხვაობა მინიმუმამდე შეამცირეს.
პირველი მეოთხედის ბოლო წამებზე შეტევა არც ერთ გუნდს გამოუვიდა, დაცვაში კი პირიქით, გუნდები ძალიან ინდომებდნენ, შესაბამისად ის მწირქულიანი გამოდგა, 10:13 სერბების სასარგებლოდ.
მეორე მეოთხედი ჩვენთვის კარგად დაიწყო, სხვაობა მინიმუმამდე შევამცირეთ, თუმცა მსაჯმა ბექა ბურჯანაძეს ტექნიკური შენიშვნა მისცა, რაც საბედნიეროდ სერბებმა ვერ გამოიყენეს.
ამის შემდეგ, მსაჯებმა მცირეხნიანი პაუზა აიღეს, ისინი დიდი ხანი ვიდეოში არჩევდნენ, დაარღვია თუ არა წესები მეტოქე გუნდის 33-ე ნომერმა, საბოლოოდ გადაწყვეტილება ჩვენს სასარგებლოდ მიიღეს, დუდამ ორი ესროლა და ანგარიში მინიმუმამდე დაიყვანა. რამდენიმე წამში ფრენკამპი მეტოქის სამწამიანში კარგად შევიდა და ჩვენი გუნდი დააწინაურა 16:15.
გუნდებმა შეცდომებს უმატეს, სამწუხაროდ ეს უფრო ჩვენ დაგვეტყო და ბალკანელები ანგარიშში კვლავ გაგვექცნენ, 18:24. თუმცა, როგორც ჩანს ჩვენს გუნდში ახალი „ესპანური“ დუეტი ყალიბდება, ფრენკამპი და შერმადინი ერთმანეთს ძალიან კარგად უგებენ.
სერბების დაცვა კარგი იყო, ჩვენი გუნდი მაქსიმალურად შეავიწროვეს, თუმცა საკმარისი არც ეს გამოდგა, მიშა ბერიშვილმა „გადაგდებული“ სამქულიანით ანგარიში 2 ქულამდე შეამცირა, თუმცა სერბებმა მაშინვე კონტრ სამიანით გვიპასუხეს და სტატუსკვო აღადგინეს 27:32.
სერბებმა ტაიმი 6 ქულიანი სხვაობით 31:37 მოიგეს, რაც სავსებით ლოგიკური და დამსახურებული შედეგი იყო.
მეორე ნახევარი სერბებმა ომახიანად დაიწყეს, შეტევაში ისინი შესანიშნავები იყვნენ და ჩვენგან აქტიური მხოლოდ დუდა სანაძე იყო, რომელსაც შესანიშნავი მატჩი ჰქონდა.
ამ ყველაფერს კონერ ფრენკამპის ტრავმა მოჰყვა, ჩვენმა სამმა ნომერმა სროლისას ფეხი ცუდად დადგა და მოედნიდან გასასვლელად დახმარება დასჭირდა.
სერბები მთელი მესამე მეოთხედის განმავლობაში 11 ქულიან სხვაობას ინარჩუნებდნენ, ჩვენი გუნდი კი მხოლოდ 8 ქულამდე მიახლოებას ახერხებდა. დიდი პრობლემა გახდა მათი პერიმეტრიდან შეჩერება, რაც ბალკანელთა მთავარ პლუსად ითვლება.
სამწუხაროდ მეტოქემ ე.წ. ბაზერიც ჩაგვიგდო და მეოთხე მეოთხედის წინ 14 ქულიანი უპირატესობით, 51:65 წავაგეთ.
მეოთხე პერიოდში მიროსლავ რადულიცა და მისი მეგობრები კიდევ უფრო გააქტიურდნენ. ჩვენს გუნდს კი ძალიან დააკლდა ფრენკამპი, რომელმაც როგორც ჩანს მძიმე ტრავმა მიიღო და მატჩში დაბრუნება ვეღარ მოახერხა. ამან ჩვენი შეტევა ძალიან უსუსური გახადა და ძირითადად მოთამაშეთა ინდივიდუალური ოსტატობის ხარჯზე ვცდილობდით მატჩის დაქაჩვას, რაც ურთულესი გამოდგა.
მატჩის დასრულებამდე 5:09 წუთით ადრე სხვაობა კოლოსალური იყო, მეტოქე წინ 24 ქულით (54:78) გაიჭრა და შეხვედრის ბოლო ფაქტობრივად ფორმალობა გამოდგა.
საბოლოოდ ჩვენი გუნდი 66-ით 92 დამარცხდა და 21-ში ევრობასკეტ 2022-ის შესარჩევი ტურის ბოლო მატჩში ფინეთს დაუპირისპირდება.
