თბილისში სტარტი აიღო ფიბა-ს ევროჩელენჯერმა, რომელშიც საქართველოს ნაკრები B ჯგუფში ასპარეზობს.
მილოშ გლიგორიევიჩის გუნდმა პირველი ტურის მატჩი საფრანგეთის ასაკობრივ ნაკრებთან გამართა, მეტოქეს განსაკუთრებული წინააღმდეგობა ვერ გაუწია და საბოლოოდ 21 ქულის სხვაობით, 63:84 დამარცხდა. ფრანგებმა ოთხი პერიოდიდან სამი მოიგეს და საბოლოო შედეგიც თამაშის სცენარს სრულად შეესაბამება.
საქართველოს 20-წლამდელთა ნაკრების რიგებში საუკეთესო ვლადიმერ თავაქარაშვილი იყო, რომელმაც 11 ქულა, 3 მოხსნა, 2 პასი და 1 ჩაჭრა დააგროვა. მან 5 სამქულიანიდან კალათში სამის მოთავსება მოახერხა, მაშინ, როცა მთლიანად გუნდმა 7 სამქულიანი ჩააგდო. ასევე 11 ქულა მიითვალა რომან ჭინჭარაულმა, ხოლო დანარჩენი კალათბურთელები 10-ქულიან ზღვარ ვერ გადასცდნენ.
სხვათა შორის, პარკეტზე თითქმის 3 წუთი გაატარა ავთანდილ ბახტაძემ, რომელიც მხოლოდ 13 წლისაა, მაგრამ შედეგიანი მოქმედებით არ გამორჩეულა. საფრანგეთის ნაკრებში გამორჩეული მილან ბარბიჩი იყო, 20 ქულით, 4 მოხსნით და 4 პასით.
21 ივლისს საქართველოს 20-წლამდელთა ნაკრები თურქეთს შეხვდება. თამაში 20:00 საათზე, თბილისის სპორტის სასახლეში გაიმართება.
