7 თებერვალს საქართველოს მორაგბეთა ეროვნული ნაკრები ყველაზე პრინციპულ მეტოქეს, რუსეთის ნაკრებს დაუპრისპირდება.
მოგეხსენებათ, რომ 2020 წლის რაგბი ევროპის ჩემპიონატის დასკვნითი მატჩი, ორჯერ გადაიდო, თუმცა როგორც იქნა ის მიხეილ მესხის სახელობის სტადიონზე 15:00 საათზე ჩატარდება.
ეს თამაში ამ ქვეყნების მიღმა დიდ რეზონანსს არასდროს იწვევს, მაგრამ ის მუდამ იმართება სარაგბო ბრძოლების საუკეთესო ტრადიციების სრული დაცვით.
ადრე ამ ქვეყნის ნაკრების წევრები, რომლებმაც პირველად ერთმანეთის წინააღმდეგ 1993 წელს ითამაშეს, მეგობრები იყვნენ და ერთად თამაშობდნენ საბჭოთა კავშირის ნაკრებში.
როგორც წესი, რაც უფრო მჭიდროა კავშირი ორ სარაგბო ოჯახს შორის, მით უფრო მძაფრი და დაძაბული გამოდის მათი შეხვედრები. საქართველოსა და რუსეთის მატჩებზე მაყურებლების დასწრება ხშირად აღემატება 50 ათასს და უცხო ამ თამაშებისთვის არც ჩხუბებია.
ეს გუნდები მანამდე ერთმანეთს 23-ჯერ დაუპირისპირდნენ. სასიამოვნოა, რომ „ბორჯღალოსნებმა“ 21-ჯერ გაიმარჯვეს, „დათვებმა“ 1-ჯერ, ხოლო 1 თამაში ფრედ დასრულდა.
ეს ორი გუნდი ერთმანეთს რეგულარულად რაგბი ევროპის ჩემპიონატზე (ყოფილი ევროპის ერთა თასი) ხვდებიან.
საქართველო რუსეთის პირველი დაპირისპირება ნეიტრალურ მოედანზე პოლონურ ქალაქ სოპოტში 1993 წლის 25 მაისს შედგა. იმ მატჩში მეტოქემ პირველად და უკანასკნელად გაიმარჯვა 15:9. ხოლო ერთადერთი ფრე, 2002 წლის 3 მარტს დინამო არენაზე (12:12) დაფიქსირდა.
ყველაზე დიდი გამარჯვება, ჩვენმა გუნდმა 2012 წლის 17 მარტს მიხეილ მესხის სახელობის სტადიონზე მოიპოვა. მამუკა გორგოძის კაპიტნობით, ჩვენმა გუნდმა ჩრდილოელ მეზობლებს ჯამში 6 ლელო დაუდეს და მეტოქე 46:0 გაანადგურეს.
ასევე ძალიან მნიშვნელოვანი თარიღია 2002 წლის 13 ოქტომბერი. ამ დღეს თბილისში, დინამო არენაზე საქართველომ რუსეთი 17:13 დაამარცხა და 2003 წლის მსოფლიოს თასის ფინალური ტურნირის საგზური პირველად მოიპოვა. ამის შემდეგ ჩვენს გუნდს პლანეტის ყველაზე მნიშვნელოვანი ტურნირი აღარ ჩაუგდია.
რაც შეეხება მოახლოებულ მატჩს, მწვრთნელებმა გაფართოებულ რაზმში 36 მორაგბეს უხმეს, რომელთაგან 10 უკეპო მოთამაშეა. გამოსარჩევია ლონდონ უოსპსის 29 წლის ბურჯის ზურაბ ჟვანიას დაბრუნება, რომელმაც მსოფლიოს ჩემპიონატი გამოტოვა და შემდეგ სამწვრთნელო შტაბსაც ღიად დაუპირისპირდა.
ჟვანიამ ბორჯღალოსნებში ბოლოს თითქმის ორი წლის წინ, 2019 წლის მარტში სწორედ რუსეთის წინააღმდეგ ითამაშა, როგორც ჩანს მასთან ლევან მაისაშვილს პრობლემა არ აქვს, რაც უდაოდ მისასალმებელია.
ზურას დიდი ხანია ნაკრებში არ უთამაშია, თუმცა დარწმუნებული ვარ, მისი გამოცდილება წაგვადგება – განაცხადა ნაკრების მთავარმა მწვრთნელმა.
ბორჯღალოსნების გაფართოებული შემადგენლობა რუსეთთან მატჩში:
ბურჯები: ზურაბ ჟვანია (40 კეპი, 55 ქულა), უშანგი ჭეიშვილი (უკეპო), ბექა გიგაშვილი (18 კეპი, 5 ქულა), გიორგი ნუცუბიძე (უკეპო), გიორგი მელიქიძე (22 კეპი, 10 ქულა);
კვაჭები: შალვა მამუკაშვილი (78 კეპი, 50 ქულა), ჯაბა ბრეგვაძე (62 კეპი, 15 ქულა), გიორგი ჭყოიძე (13 კეპი, 5 ქულა);მეორე ხაზი: ნოდარ ჭეიშვილი (27 კეპი), ლაშა ჯაიანი (6 კეპი), გიორგი ჯავახია (4 კეპი), დავით გიგაური (6 კეპი, 5 ქულა), იოსებ გუშარაშვილი (უკეპო);
მესამე ხაზი: გიორგი თხილაიშვილი (60 კეპი, 60 ქულა), ბექა საღინაძე (17 კეპი, 15 ქულა), სანდრო მამამთავრიშვილი (უკეპო), ირაკლი ცხადაძე (უკეპო), მიხეილ გაჩეჩილაძე (12 კეპი, 10 ქულა), ნიკა სუხაშვილი (უკეპო), თორნიკე ჯალაღონია (4 კეპი);
ღერძი: ვასილ ლობჟანიძე (56 კეპი, 40 ქულა), გელა აფრასიძე (29 კეპი, 24 ქულა), მიხეილ ალანია (1 კეპი); თედო აბჟანდაძე (20 კეპი, 118 ქულა), ლუკა მატკავა (უკეპო), გიორგი ბაბუნაშვილი (უკეპო), ლაშა ხმალაძე (85 კეპი, 53 ქულა);
ხაზი: მერაბ შარიქაძე (71 კეპი, 60 ქულა), აკა ტაბუცაძე (7 კეპი, 30 ქულა), ოთარ ლაშხი (უკეპო), დემე თაფლაძე (5 კეპი, 5 ქულა), მირიან მოდებაძე (13 კეპი, 30 ქულა), თამაზ მჭედლიძე (60 კეპი, 35 ქულა), თემურ კოხოძე (უკეპო), სოსო მათიაშვილი (30 კეპი, 152 ქულა), დავით ნინიაშვილი (2 კეპი).
