რუსეთის მორაგბეთა ნაკრებთან გაუქმებული შეხვედრის და 2-კვირიანი იძულებითი პაუზის შემდეგ, „ბორჯღალოსნებმა“ რაგბი ევროპის ჩემპიონატის მორიგი შეხვედრა სტუმრად, რუმინეთის ნაკრების წინააღმდეგ გამართეს. ლევან მაისაშვილის გუნდმა მეტოქე დაძაბულ ბრძოლაში 13:24 დაამარცხა და ანთიმოზ ივერიელის სახელობის თასის გამარჯვებულიც გახდა, რომელიც რამდენიმე ათწლეულია საქართველოსა და რუმინეთის ნაკრებებს შორის თამაშდება.
საქართველოს ნაკრებისთვის შეხვედრა მძიმედ დაიწყო. მე-5 წუთზე მეტოქეზე ჰაერში თამაშის გამო მთავარმა მსაჯმა აკა ტაბუცაძეს ყვითელი ბარათი უჩვენა და „ბორჯღალოსნები“ მოედანზე 10 წუთით კაცნაკლულნი დარჩნენ.
რიცხობრივი უპირატესობის მიუხედავად, რუმინელმა მორაგბეებმა უპირატესობის მოპოვება ვერ შეძლეს და პირიქით, პირველი ქულები ლევან მაისაშვილის მორაგბეებმა მოიპოვეს. მე-9 წუთზე მეტოქის შეცდომით ვასკა ლობჟანიძემ ისარგებლა და მატჩის პირველი ლელო დადო. ამას მოჰყვა თედო აბჟანდაძის მიერ ზუსტად შესრულებული გარდასახვა და საქართველოს ნაკრები 0:7 დაწინაურდა.
მე-17 და 21-ე წუთებზე რუმინელთა 15-მა ნომერმა ორი საჯარიმო ზუსტად შეასრულა და სხვაობა მინიმუმამდე შეამცირა – 6:7.
28-ე წუთზე სტადიონზე შეკრებილმა გულშემატკივარმა მეორე ლელო იხილა. რუმინელთა სათამაშო მოედანში, ლელოს ხაზიდან 5 მეტრში დანიშნული შერკინება ქართველმა მორაგბეებმა ბწყინვალედ გამოყენეს და ჩვენი გუნდის კაპიტანმა, ბუკა შარიქაძემ რუმინეთს მეორე ლელო დაუდო. თედო აბჟანდაძემ გარდასახვა ამჯერადაც ზუსტად გამოიყენა და ანგარიში 6:14 გახდა.
აღნიშნული ეპიზოდი პირველ ტაიმში გარდამტეხი მომენტი აღმოჩნდა. მეორე ლელოდან ზუსტად 5 წუთში ქართველმა მორაგბეებმა რუმინეთს მესამე ლელო დაუდეს. თავი ამჯერად ირაკლი თოდუამ გამოიჩინა, თედო აბჟანდაძემ კი გარდასახვა ამ შემთხვევაშიც ზუსტად შეასრულა საქართველოს ნაკრების უპირატესობა კომფორტული გახდა – 6:21.
ტაიმის მიწურულს რუმინელებმა პირველი ლელოს დადება შეძლეს. მასპინძლებმა ქართველი მორაგბეების უყურადღებო თამაშით კარგად ისარგებლეს და ანგარიში 7-ქულამდე შეამცირეს – 13:21.
მეორე ნახევარი „ბორჯღალოსნებისთვის“ უმძიმესი გამოდგა. სამწუხაროდ, ზოგადად მთელ შეხვედრაში ჩვენმა ბიჭებმა არაერთი შეცდომა დაუშვეს, ამის რაოდენობამ კი მეორე ნახევარში კიდევ უფრო იმატა. ტაიმის დებიუტი მასპინძლებმა აქტიურად დაიწყეს და 43-ე წუთზე მეტოქის 15-მა ნომერმა მორიგი ჯარიმა გაიტანა – 16:21.
66-ე წუთზე მსაჯმა მოედნიდან გელა აფრასიძე გააძევა და ჩვენი გუნდს დასკვნითი წუთების ჩატარება კაცნაკლულს მოუწია. ამან ბუნებრივია გარკვეულწილად თამაშის მიმდინარეობაზე თავისი გავლენაც მოახდინა და დასკვნითი წუთების გატარება ქართველ მორაგბეებს თავდაცვის რეჟიმში მოუწიათ.
ურთულესი სიტუაციაში ჩავარდნის მიუხედავად, „ბორჯღალოსნებმა“ 73-ე წუთზე თავისი სათქმელი მაინც მაინც თქვა. შერკინებიდან გათამაშებული ბურთი ქართველმა მორაგბეებმა მარჯვენა ფლანგზე გადაიტანეს, რომელიც აკა ტაბუცაძემ სისწრაფის ხარჯზე რუმინელებს შანსი არ დაუტოვა. შესაბამისად, საქართველომ შეხვედრაში მეოთხე, თავის ანგარიშზე კი მესამე ლელო დადო და მატჩის ბედიც გადაწყვიტა – 16:26.
რიცხობრივმა უპირატესობამ თავისი როლი მაინც ითამაშა და რუმინელებმა 76-ე წუთზე ჩვენს ნახევარზე მორიგი ლელო დადეს, ზუსტად შესრულებული გარდასახვით კი სხვაობა 3-ქულამდე შეამცირეს – 23:26.
საბედნიეროდ, დარჩენილ წუთებში ანგარიში აღარ შეცვლილა და „ბორჯღალოსნებმა“ გამარჯვება მაინც შეძლეს, მართალია უმძიმეს ბრძოლაში, თუმცა თამაშამდეც, პროგრამა მინიმუმი მაინც შესრულებული გვქონდა – ლევან მაისაშვილის გუნდმა 2023 წლის მსოფლიო თასზე თამაში ტურნირის დასრულებამდე რამდენიმე ტურით ადრე გაინაღდა. საქართველოს ნაკრები რაგბი ევროპის ჩემპიონატის 2022 წლის სეზონის დასკვნით შეხვედრას 20 მარტს, „დინამო არენაზე“ ესპანეთის ნაკრების წინააღმდეგ გამართავს და გამარჯვების შემთხვევაში ტურნირის ჩემპიონობას იზეიმებენ.
