საქართველოს ფეხბურთის ფედერაციის პრეზიდენტმა, ლევან კობიაშვილმა მსოფლიო ჩემპიონატის შესარჩევ ეტაპზე ეროვნული ნაკრების თამაშები შეაფასა.
პირველი არხის ეთერში, გადაცემა „ტაიმაუტში“ სტუმრობისას კობიაშვილმა განაცხადა, რომ ნაკრების თამაშში პოზიტიური ნიუანსები შეინიშნება, თუმცა არსებობს გარკვეული სახის პრობლემებიც, რომელიც დროთა განმავლობაში აუცილებლად გამოსწორდება.
„პირველი ჩნდება კითხვა, რა ფეხბურთს თამაშობს გუნდი. ეს ფეხბურთელებმა მოკლე პერიოდში გაიგეს. მე დარწმუნებული ვარ, ვილისთან ერთად ამ გუნდს მომავალი აქვს. მიხარია, რომ სამწვრთნელო სტაფის და გუნდის ერთიანობამ კარგად იმუშავა. ცხადია, სანიოლი რაღაცებში კმაყოფილია, რაღაცებით კი უკმაყოფილო. მისასალმებელია, რომ სათამაშო დისციპლინის მხრივ პოზიტივი იყო. თუმცა, პრობლემები გვაქვს და ვილი სანიოლისთან ამაზე ვისაუბრეთ. ვიცით, რომელია ჩვენი ნაკრების მტკივნეული ადგილები და რა მიმართულებით უნდა ვიმუშავოთ“, – აღნიშნა კობიაშვილმა.
მისივე თქმით, ნაკრების ფეხბურთელებთან შეხვედრის დღიდან სანიოლმა მოთამაშეების ფსიქოლოგიურ მდგომარეობაზე კარგად იმუშავა და ეს განვლილ შეხვედრებშიც გამოჩნდა.
„პირველი ორი მატჩის დასანანი წაგების შემდეგ ვილიმ და მისმა სამწვრთნელო სტაფმა გუნდთან ფსიქოლოგიურად კარგად იმუშავა. ორი ურთულესი თამაში წავაგეთ და იყო იმედგაცრუება, წასაგები მატჩები არ იყო, გუნდთან ფსიქოლოგიური მუშაობა იყო საჭირო საბერძნეთთან, რომელიც დასვენებული იყო და სახლში თამაშობდა. ამას დაემატა გასვლაზე გაშვებული გოლი. მაგრამ ამის შემდეგ შევუტიეთ და გოლის გატანა მოვახერხეთ. ამის შემდეგ ჩვენ უფრო ვიყავით გუნდი, რომელსაც მოგება სურდა და სჯეროდა“, – განაცხადა ლევან კობიაშვილმა.
შეგახსენებთ, რომ მარტში საქართველოს ნაკრებმა მსოფლიო ჩემპიონატის შესარჩევი ეტაპის სამი მატჩი გამართა. 25 მარტს ქართველი ფეხბურთელები სტუმრად შვედეთთან მინიმალური სხვაობით, 1:0 დამარცხდნენ. 28 მარტს „დინამო არენაზე“ ვილი სანიოლის გუნდმა ესპანეთის წინააღმდეგ მატჩი 1:2 დათმო, 31 მარტს კი საბერძნეთის ნაკრებთან სტუმრად 1:1 ითამაშეს.
ქართველი ფეხბურთელები მომდევნო შეხვედრას 2 სექტემბერს, „დინამო არენაზე“ კოსოვოს ნაკრების წინააღმდეგ გამართავენ.
