პოლონეთის დედაქალაქში მიმდინარე ევროპის ჩემპიონატზე თავისუფალ სტილით ჭიდაობაში -97 კილოგრამ წონით კატეგორიაში ელიზბარ ოდიკაძე ნახევარფინალში დამარცხდა და ბრძოლას ბრინჯაოს მედლისთვის გააგრძელებს.
ქართველმა ფალავანმა საკვალიფიკაციო ეტაპზე მაკედონიელი მოჭიდავე, მაგომედგაჯი ომარდიბიროვიჩ ნუროვი 5:0 დაამარცხა, ხოლო მეოთხედფინალში ოდიკაძემ ბელარუსი ალიკსანდრ ჰუშტინი დაამარცხა.
ნახევარფინალში ელიზბარი თურქ სპორტსმენს სულეიმან კარადენიზს შეხვდა, რომელსაც პირველი პერიოდი 5:0 მოუგო, თუმცა მეორე ნახევარში ოდიკაძემ მოპოვებული უპირატესობა გაანიავა, 5:7 დამარცხდა და ფინალურ ბლოკში ბრინჯაოს მედლისთვის იბრძოლებს.
ფინალური ბლოკი კი ხვალ, 20 აპრილს გაიმართება და თბილისის დროით 20:00 საათზე დაიწყება. აქვე გეტყვით, რომ დღეს ნახევარფინალში ნიკა კენჭაძე დამარცხდა, რომელიც ხვალ ბრინჯაოს მედლისთვის იბრძოლებს.
