მარტში დაწყებული მსოფლიო ჩემპიონატის საკვალიფიკაციო მატჩების ნაწილი მოლეულია. ფეხბურთის გულშემატკივარს ეცოდინება, რომ სკანდალური გამოდგა დაპირისპირება სერბეთისა და პორტუგალიის ნაკრებებს შორის.
ბელგრადში გამართული დაპირისპირება ფრედ 2:2 დასრულდა, მაგრამ თამამად შეიძლება ითქვას, რომ პორტუგალიას ალალი 3 ქულა წაართვეს. მატჩის მიწურულს, კრიშტიანო რონალდუს 100 პროცენტიანი გოლი გააუქმეს. ეს ნიდერლანდელმა ლაინსმენმა მარიო დიკსმა გააკეთა.
მატჩის დასრულების შემდეგ, მთავარი არბიტრი დენი მაკელიე პორტუგალიელთა გასახდელში შევიდა და გუნდის დამრიგებელს ფერნანდუ სანტოშს ბოდიში მოუხადა.
ნიდერლანდელი ლაინსმენისთვის ეს შეცდომა საბედისწერო გამოდგა. ის მაკელიემ საკუთარი ბრიგადიდან დაითხოვა.
„მარიოსთან წლების განმავლობაში ვმუშაობდი. ეს არ იყო მარტივი გადაწყვეტილება, მაგრამ გარემოებებმა ასე მოიტანა. ამ თემის განვრცობა აღარ მსურს. გული მწყდება მომხდარზე. დიკსი ჩვენს სამსაჯო გუნდში აღარ იქნება. მას იან დე ვრიესი შეცვლის“ – აღნიშნა მაკელიემ.
ევროპის ჩემპიონატის წინ, დიკსისთვის ეს უსათუოდ დიდი დარტყმაა.
„საწყენი ამბავია. ევროპის ჩემპიონატისთვის საგულდაგულოდ ვემზადებოდი. არ დაგიმალავთ და იმედგაცრუებული ვარ. ცუდია, რომ ჩვენს შორის ნდობა დაიკარგა. ერთად მრავალწლიანი ნაყოფიერი მუშაობის შემდეგ მეგონა, რომ მათგან მეტ მხარდაჭერას ვიგრძნობდი“ – კომენტარი გააკეთა თავად მარიო დიკსმაც.
მარიო დიკსი მაკელიეს სამსაჯო ბრიგადაში წლების განმავლობაში მუშაობდა და გასულ წელს ევროპა ლიგის ფინალზე, წელს კი მსოფლიოს საკლუბო ჩემპიონატის 1/2 ფინალს გაუძღვა. ამიერიდან კი ეს თანამშრომლობა შეწყდება.
