ყაზანის „რუბინი“, რომლის ღირსებას ხვიჩა კვარაცხელია და ზურიკო დავითაშვილი იცავენ, ახალი სეზონისთვის საკუთარ ბაზაზე ემზადება. კვარაცხელიას ევროპაში მოსალოდნელ ტრანსფერზე ბევრი დაიწერა და მის განხორციელებას ევროპის ჩემპიონატის დასრულების შემდეგ ელოდებიან, ზურიკო დავითაშვილის მომავალი კი უფრო ბუნდოვანია.
იმის მიუხედავად, რომ ზურიკო ვოლგოგრადის გუნდში აშკარად გამორჩეული იყო, დავითაშვილმა „როტორში“ შედეგიანი მოქმედებებით თავი ვერ გამოიჩინა. 22 მატჩში არცერთი გოლი და საგოლე პასი, „როტორი“ გავარდა, ზურიკოს კი იჯარის ვადა გაუვიდა და ამ ზაფხულს „რუბინს“ დაურუნდა.
ზურიკო დავითაშვილის პერსპექტივაზე ადგილობრივი მედია წერს, საიდანაც ირკვევა, რომ ლეგიონერების სიმრავლისა და მის პოზიციაზე მაღალი კონკურენციის გამო, 20 წლის ქართველ ნახევარმცველს ლეონიდ სლუცკის გუნდში დამკვიდრება ძალიან გაუჭირდება.
„ამჟამად რუბინს 11 უცხოელი მოთამაშე ჰყავს, საიდანაც 8 უნდა დარჩეს. ერთ-ერთი, ვინც ამ სიას უნდა გამოაკლდეს, ზურიკო დავითაშვილია. რუბინი განიხილავს როგორც იჯარის მორიგ ვარიანტს, ისე ფეხბურთელის გაყიდვის შესაძლებლობას“, – წერს business-gazeta.
