საქართველოს მორაგბეთა ნაკრების კაპიტანმა, მერაბ შარიქაძე პირველი არხის ეთერში საქართველოსა და რუსეთის ნაკრებების სარაგბო დაპირისპირებაზე ისაუბრა.
28 წლის მორაგბემ მატჩი კიდევ ერთხელ შეაფასა და განაცხადა, რომ ხშირ შემთხვევაში ნერვიულობა მორაგბეებს თამაშის მიმდინარეობისას ხელს უშლის.
„ამ თამაშის პოზიტიურად შეფასება გამიჭირდება. ყველას უკეთესი თამაში გვინდოდა, მორაგბეებსაც, გულშემატკივრებსაც, მწვრთნელებსაც, მაგრამ სამწუხაროდ, არ გამოგვივიდა. პასუხისმგებლობას ვიღებთ, თავს არ ვიმართლებთ და პასუხისმგებლობას არასოდეს არ გავურბივართ. ზედმეტად ვინერვიულეთ, ჩემი თამადობით. რატომ უნდა ინერვიულოს სპორტსმენმა? იმიტომ უნდა ინერვიულოს, რომ პირველ რიგში, ეროვნული ნაკრების მორაგბე ყოველთვის თამაშობს საქართველოსა და თითოეული მოქალაქის სახელით. ეს ძალიან დიდი პასუხისმგებლობაა და სწორედ რუსეთთან არის ეს პასუხისმგებლობა გაათმაგებული. ყველასთვის ეს თამაში ძალიან მნიშვნელოვანია, ჩვენც ჩვეულებრივი ადამიანები ვართ და თავისთავად ვნერვიულობთ, როცა ასეთი პასუხისმგებლობა გვაქვს, რომ შევასრულოთ წარმატებით, იმედები არავის გავუცრუოთ. ხშირ შემთხვევაში ეს გადაჭარბებული ნერვიულობა ხელს უშლის სპორტსმენს. არიან, ალბათ, ერთეული სპორტსმენები, რომლებსაც ნერვიულობა ვერაფერს აკლებს. ჩვენ კი ვისწრაფვით ამისკენ, რომ ყველაზე მაგარი ინდივიდები ვიყოთ ნაკრებში, მაგრამ, სამწუხაროდ, წინ კიდევ გრძელი გზაა“, – განმარტავს სპორტსმენი.
მერაბ შარიქაძემ ასევე აღნიშნა, რომ თამაშამდე წინასწარი პროგნოზების გაკეთება არ უყვარს, რადგან სპორტს ხშირად ახლავს მოულოდნელობები. მორაგბემ მაგალითად ინგლისისა და შოტლანდიის ნაკრებების დაპირსპირება მოიყვანა, სადაც შოტლანდიამ მეტოქე სტუმრად ბოლო 39 წლის განმავლობაში პირველად დაამარცხა.
„როცა ვიცით, რომ გაუთვალისწინებელი შემთხვევა სპორტში შეიძლება მოხდეს, განსაკუთრებით, ზუსტად ამიტომ ვნერვიულობთ რუსეთთან მატჩის დროს. ეს არის თამაში, რომლის წაგებასაც, პირდაპირ ვამბობ, მეც და ნებისმიერ მოთამაშეს სიკვდილი გვირჩევნია, მირჩევნია მოვკვდე, ოღონდ ეს თამაში არ წავაგო“, – განაცხადა შარიქაძემ გადაცემა „ტაიმაუტის“ ეთერში.
