რუსეთის საფეხბურთო კავშირი კატეგორიულად აკრიტიკებს ფიფასა და უეფას გადაწყვეტილებას, რომლის თანახმადაც ყველა რუსულ გუნდს საერთაშორისო ტურნირებზე მონაწილეობა აეკრძალა.
“მიგვაჩნია, რომ ეს გადაწყვეტილება საერთაშორისო შეჯიბრების ნორმებსა და პრინციპებს, ასევე სპორტულ სულისკვეთებას ეწინააღმდეგება.
მიღებულ გადაწყვეტილებას აშკარად დისკრიმინაციული ხასიათი აქვს და უამრავ სპორტსმენს, მწვრთნელს, კლუბისა და ეროვნული გუნდის თანამშრომლებს აყენებს ზიანს, რაც ყველაზე მთავარია, მილიონობით რუს და უცხოელ გულშმატკივარსაც, რომელთა ინტერესებიც პირველ რიგში საერთაშორისო სპორტულმა ორგანიზაციებმა უნდა დაიცვან.
მსგავსი ქმედებები ყოფს მსოფლიო სპორტულ საზოგადოებას, რომელიც ყოველთვის იცავდა თანასწორობის, ურთიერთპატივისცემის და პოლიტიკისგან დამოუკიდებლობის პრინციპებს.
ჩვენ ვიტოვებთ უფლებას, გავასაჩივროთ ფიფასა და უეფას გადაწყვეტილება სპორტის საერთაშორისო კანონმდებლობის შესაბამისად”, – ვკითხულობთ რუსეთის საფეხბურთო კავშირის განცხადებაში.
