პანდემიით შეშლილი და თავდაყირა დაყენებული მსოფლიო, რომელმაც სპორტზეც უდიდესი ზეგავლენა იქონია. ჩაშლილი შეჯიბრებები, გადადებული მსხვილი ტურნირები ან უკეთეს შემთხვევაში არეული გეგმები. ასეთი იყო უხილავი მტრის მიერ შექმნილი რეალობა და სპორტული 2020 წელი, რომლის მტარვალი ხელიც სპორტს 2021 წლის მინიმუმ პირველ ნახევარში ისევ დაეტყობა.
ამის დასტური კი ავსტრალიის ღია პირველობაა, რომელიც ტრადიციულის ნაცვლათ ერთი თვის დაგვიანებით, 8 თებერვალს დაიწყება და ყველა მისი წინამორბედისგან უჩვეულო იქნება. თავად განსაჯეთ – საკვალიფიკაციო ეტაპის მატჩები არა უშუალოდ მელბურნში, როგორც ეს წესით და რიგით უნდა ყოფილიყო, არამედ სხვა ქვეყანაში გაიმართება.
საუბარია ვაჟთა შორის წინასწარ მატჩებზე, სადაც 128 ჩოგბურთელი ძირითადი ბადის 16 საგზურისთვის იბრძოლებენ, ტურნირი კი დოჰაში გაიმართება. ამის შესახებ პოპულარული ესპანური გამოცემა Marca წერს.
საკვალიფიკაციო ეტაპის მატჩები ყატარის დედაქალაქში 10-13 იანვარს გაიმართება. 16 რჩეული, ძრითადი ბადის სხვა მონაწილეებთან ერთად მელბურნში 15 იანვრიდან დაიწყებენ ჩასვლას და 14 დღიან კარანტინს გაივლიან.
