ეჭვგარეშეა, რომ ცხელი სატრანსფერო ზაფხული გველის. ევროპული გრანდები სასურველი ფეხბურთელების გადაბირებისთვის ყველაფერს გააკეთებენ, ერთ-ერთი მთავარი სამიზნე კი ერლინგ ჰალანდი იქნება.
ნორვეგიელ ფორვარდზე უცხოურ მედიაში არაერთი ინფორმაცია ვრცელდება. ჰალანდი თითქმის ყველა გრანდს დაუკავშირეს, თუმცა გამოკვეთილ ფავორიტებად მაინც „რეალს“, „ბარსელონას“ და „ჩელსის“ მიიჩნევენ.
დორტმუნდის „ბორუსიას“ ბოსები კი ჯიუტად ამტკიცებენ, რომ ჰალანდი მომავალ სეზონშიც მათთან ითამაშებს და გუნდის ერთგული დარჩება. ამის შესახებ გერმანული კლუბის პრეზიდენტმა მიხაელ ცორკმა კიდევ ერთხელ განაცხადა.
„ბოლო პერიოდში თუთიყუშად ვიქეცი. თითქმის ყოველდღიურად მიწევს გამეორება, რომ ჰალანდი დორტმუნდს არ დატოვებს. ერლინგი შემდეგ სეზონშიც აუცილებლად ჩვენთან იქნება. ამას კიდევ უამრავჯერ ვიტყვი თუ ეს თქვენ გინდათ და დაგამშვიდებთ, მაგრამ ვფიქრობ ჩემი სიტყვები არავის აინტერესებს“ – ამბობს დორტმუნდის პრეზიდენტი.
ერლინგ ჰალანდი დორტმუნდის ღირსებას 2019 წლიდან იცავს და ჯამში უკვე 55 გოლი გაიტანა.
