ოლიმპიური თამაშები რომ ოთხწლეულის ყველაზე გრანდიოზული სპორტული ფორუმია წყალი არ გაუვა, მაგრამ ჩოგბურთის შემთხვევაში ბოლომდე ვერ ამოიძირკვა ის მანკიერი შეხედულება, რასაც მისდამი ინდეფერენტული დამოკიდებულება ჰქვია.
ერთი პერიოდი, მაღალი დონის ჩოგბურთელები ოლიმპიური თამაშებისკენ არც იხედებოდნენ, თუმცა შემდეგ სიტუაცია უკეთესობისკენ შეიცვალა და ოლიმპიადაზე ჩოგნის ქნევა არაერთი ტოპ მოთამაშისთვის პრესტიჟული და საამაყო გახდა, თუმცა არა ყველასთვის.
ეს შესავალი კი იმად დაგვჭირდა, რომ ავსტრიელი ჩოგბურთელის, 2020 წლის ამერიკის ღია პირველობის ჩემპიონის დომინიკ ტიმის მამა შვილის გადაწყვეტილებამ გააოგნა, რომელიც ტოკიოს ოლიმპიურ თამაშებზე ასპარეზობას უკავშირება.
„დომინიკმა ტოკიოში გამგზავრება და ოლიმპიადაზე თამაში გადაწყვიტა. ეს მისი დიდი სურვილია, რამაც ცოტა არ იყოს გამაკვირვა. ვფიქრობ, ეს ამერიკის ღია პირველობის მოგებამ განაპირობა. ასეთი სერიოზული წარმატების შემდეგ მან თავს უფლება მისცა, ოლიმპიური თამაშების დონის შეჯიბრებებზეც გაამახვილოს ყურაღება. ოლიმპიადა ჩოგბურთში ბევრს არაფერს ნიშნავს, თუმცა მის გადაწყვეტილებას ვერ შევეწინააღმდეგები“ – ამბობს ვოლფგანგ ტიმი.
მსოფლიო პანდემიამდე, დომინიკ ტიმი „ტოკიო 2020“-ის გამოტოვებას აპირებდა, რადგან ჯერ კიდევ არ ამოწურულა კიტსბულის ტურნირთან მისი ვალდებულება, რომელიც სწორედ ოლიმპიადას ემთხვეოდა, თუმცა ტოკიოს თამაშების 2021 წელს გადადებამ ტიმს გეგმები შეუცვალა და ახლა ავსტრიელს მტკიცედ გადაუწყვეტია ოლიმპიურ თამაშებზე საკუთარი ქვეყნის ღირსება დაიცვას.
რაც შეეხება 2016 წლის ოლიმპიურ თამაშებს, დომინიკ ტიმი რიოში არ გაემგზავრა, რადგან მას ATP-ის სხვადასხვა ტურნირები და დევისის თასი ამჯობინა.
