საქართველოს მორაგბეთა ეროვნული ნაკრები რაგბი ევროპის ჩემპიონატის მეორე ტურის მატჩისთვის ემზადება. ბორჯღალოსნებმა დღეს პორტუგალიაში ბოლო ვარჯიში გამართეს, ხვალ კი ესპანეთში გადაინაცვლებენ, სადაც შეხვედრამდე ბოლო, ამჯერად კაპიტნის ვარჯიშს ჩაატარებენ.
დღევანდელი ვარჯიშის დასრულების შემდეგ, საქართველოს ნაკრების მთავარმა მწვრთნელმა, ლევან მაისაშვილმა და მორაგბეებმა, თედო აბჟანდაძემ და გელა აფრასიძემ რაგბის კავშირის წარმომადგენელთან მცირე კომენტარი გააკეთეს.
გელა აფრასიძე: ვარჯიშებმა კარგად ჩაიარა. წინა თამაშში დაშვებული შეცდომები გამოვასწორეთ და ესპანეთისთვის უფრო კარგად ვართ მომზადებულები. კაპიტნის ვარჯიში დაგვრჩა და ვფიქრობ, რომ ესპანეთთან თამაშს მოვიგებთ.
თედო აბჟანდაძე: სავარჯიშო კვირა ვარჯიშებით დატვირთული იყო. 4 დღე გვქონდა ვარჯიში, რამაც შედეგი გამოიღო. ვიმუშავეთ ჩვენს სუსტ მხარეებსა და იმ შეცდომებზე, რაც პორტუგალიასთან დავუშვით. ვფიქრობ, რომ ესპანეთთან თამაშისთვის ყველანი მზად ვართ და რა თქმა უნდა, ჩვენი მთავარი მიზანი იქნება გამარჯვება.
ლევან მაისაშვილი: მოსამზადებელი კვირა უფრო გრძელი გვქონდა. გვქონდა იმის დროც, რომ რეაბილიტაცია კარგად გაგვევლო. ბიჭებმა ორი სრული დღე დაისვენეს და რეაბილიტაცია გააკეთეს. ამის შემდეგ გვქონდა დაბალი ინტენსივობის ვარჯიში, გვქონდა ასევე საშუალო და მაღალი ინტენსივობის ვარჯიშებიც. ტრავმების გამო რამდენიმე მოთამაშის დასვენება მოგვიწია, მაგრამ დღეისთვის უკვე სრულყოფილად ვივარჯიშეთ. დავხვეწეთ ის კომპონენტები, რაც აშკარად ჩანდა პორტუგალიასთან თამაშზე. იმედს ვიტოვებ, რომ ესპანეთთან უფრო შეთამაშებული და მომზადებული ვიქნებით, უკეთ შევძლებთ თამაშის მართვას და შესაბამისად, ჩვენი ძლიერი მხარეების გამოყენებას.
შეგახსენებთ, რომ ესპანეთისა და საქართველოს ნაკრებების სარაგბო დაპირისპირება 13 მარტს, თბილისის დროით 15:45 საათზე დაიწყება.
