გრუნტის მეფე – ასე შევიდა რაფაელ ნადალი საჩოგბურთო სამყაროს ისტორიაში და გვეეჭვება მრავალი წელი მას ვინმემ ეს წოდება ჩამოართვას. ესპანელი მატადორის „როლან გაროსზე“ ყოჩაღობა ვინძლო ბავშვმაც კი იცის. ბულონის ტყეში მას მხოლოდ ორჯერ აქვს წაგებული, საფრანგეთის ღია პირველობა კი შარშან მეცამეტედ მოიგო.
არაერთი ჩოგბურთელი ოცნებობს რაფა თიხის საფარის კორტზე, განსაკუთრებით კი როლან გაროსზე დაამარცხოს. აქამდე ეს მხოლოდ ორმა მეჩოგნემ შეძლო – შვედმა რობინ სოდერლინგმა და სერბმა ნოვაკ ჯოკოვიჩმა.
და აი, ახალგაზრდა ჩოგბურთელმა სტეფანოს ციციპასმა 2021 წლის მთავარი მიზანიც დაისახა. ბერძენი მეჩოგნის თქმით, მისი ამოცანა იქნება წელს, მაისში, „როლან გაროსზე“ რაფაელ ნადალს მოუგოს.
„ამის გაკეთება ალბათ ყველას უნდა, მაგრამ მე განსაკუთრებით. მსურს ნადალს მის სამფლობელოში, ბულონის ტყეში, როლან გაროსის კორტებზე ვაჯობო. ჩვენ ერთმანეთს არაერთხელ შევხვედრივართ და ხშირად მას მოუგია. მსურს ეს განცდა შევიგრძნო“ – ამბობს სტეფანოს ციციპასი.
რაფას და ციციპასის ურთიერთდაპირისპირება დღემდე 8 მატჩს ითვლის, რომელთაგან ბერძენმა მხოლოდ ერთხელ იმარჯვა და რაოდენ გასაკვირიც არ უნდა იყოს გრუნტის საფარზე. ეს 2019 წელს, მადრიდის მასტერსზე მოხდა.
