ქუთაისის „ტორპედომ“ კახა ჩხეტიანი მთავარი მწვრთნელის პოსტიდან გაათავისუფლა. ინფორმაცია ქუთაისურმა კლუბმა ოფიციალურ Facebook-გვერდზე გაავრცელა:
„ქუთაისის “ტორპედოს” მიერ ბოლო პერიოდში ნაჩვენები შედეგებისა და დღეის მდგომარეობით არსებული სატურნირო ვითარების გათვალისწინებით, კლუბის ხელმძღვანელობამ მიიღო გადაწყვეტილება, შეეწყვიტა თანამშრომლობა კახაბერ ჩხეტიანთან.
საფეხბურთო კლუბი ქუთაისის “ტორპედო” გაწეული სამუშაოსთვის მადლობას უხდის კახაბერ ჩხეტიანს და წარმატებას უსურვებს შემდგომ საქმიანობაში.“ – ნათქვამია განცხადებაში.
ბოლო პერიოდში 43 წლის სპეციალისტს „ტორპედოში“ სახარბიელო მდგომარეობა ნამდვილად არ ჰქონდა. ეროვნული ლიგის სატურნირო ცხრილში ქუთაისური კლუბი 32 ტურის შემდეგ, 30 ქულით მე-8 ადგილს იკავებს და გასავარდნ ზონაში იმყოფება. „ტორპედო“ ბოლო ტურში საკუთარ მოედანზე გორის „დილასთან“ 0:3 დამარცხდა.
რაც შეეხება ჩხეტიანის სამუშაო პერიოდს, ის ქუთაისურ კლუბს თავდაპირველად 2016-2019 წლებში წვრთნიდა. 2019 წლის ზაფხულში ჩხეტიანი თბილისის „დინამოს“ ჩაუდგა სათავეში, 2021 წლის ზაფხულში კი ის კვლავ „ტორპედოში“ დაბრუნდა.
