გუშინ ცნობილი გახდა, რომ ლეგენდარული ქართველი მოჭადრაკე, ნონა გაფრინდაშვილი ამერიკულ კომპანია „Netflix“-ს ფაქტების დამახინჯებისთვის სასამართლოში უჩივის.
აღნიშნულ სარჩელთან დაკავშირებით დღეს პირველი კომენტარი ქართველი დიდოსტატის უფლებადამცველმა გააკეთა. რუსუდან მაისურაძის სიტყვებს 1TV.GE ციტირებს.
„ქალბატონი ნონა 22 წლის ასაკიდან, 1963 წლიდან მონაწილეობდა ვაჟთა ტურნირებში, იყო საკვალიფიკაციო ეტაპის გამარჯვებული და პირველი ქალია, ვინც მამაკაცთა შორის დიდოსტატის ტიტული მიიღო. ამ დროს, გადაღებულ ეპიზოდში ნახსენებია, რომ „არასდროს დაპირისპირებია მამაკაცებს“. რა თქმა უნდა, ფაქტების ასეთი დამახინჯება შეურაცხმყოფელია.
სარჩელი აპრილში შევიტანეთ, რადგან მანამდე „ნეტფლიქსთან“ დალაპარაკებას შედეგი არ მოუტანია. ისინი ამბობენ, რომ ქალბატონი გაფრინდაშვილისა და მისი ბრწყინვალე კარიერის მიმართ „ნეტფლიქსს“ მხოლოდ უსაზღვრო პატივისცემა გააჩნია. თუმცა, მიიჩნევენ, რომ სარჩელი უსაფუძვლოა და არც ბოდიშის მოხდას აპირებენ და არც ტექსტის შეცვლას. ესაა ყველაზე მიუღებელი – ყველაზე მთავარი დაამახინჯეს, რამაც ქალბატონი ნონა შეურაცხყო. ჩვენ ამ საქმეს უკვე დავარქვით „ღირსების საქმე“ და ამერიკელ პარტნიორებთან ერთად საქმის ბოლომდე მიყვანას შევეცდებით.
ამერიკის სასამართლოს სამართლიანობა ცნობილია და მის ობიექტურობაში დარწმუნებულები ვართ. ამიტომ გვჯერა, რომ ისინი შესაბამის გადაწყვეტილებას მიიღებენ“, – განმარტავს მაისურაძე.
საქმე ეხება მინისერიალ „დედოფლის გამბიტს“, სადაც ნახსენებია, რომ მთავარი პერსონაჟი, რომელიც ქალი მოჭადრაკეა მამაკაცებს არ დაპირსპირებია.
სინამდვილეში კი რა პერიოდსაც ეს ფილმი მოგვითხობს, ამ დროისთვის ლეგენდარულ დიდოსტატს 25 მამაკაცი ჰყავდა დამარცხებული, ამასთან, მას მონაწილეობა აქვს მიღებული ისეთ ტურნირში, სადაც 7 მამაკაცი მოჭადრაკე დაამარცხა და ჩემპიონიც გახდა. გამოდის, რომ ჯამში გაფრინდაშვილს ამ პერიოდში მინიმუმ 32 მამაკაცი მოჭადრაკისთვის აქვს მოგებული.
