2023 წელს, ფეხბურთში ევროპის ახალგარზდული ჩემპიონატი რომ საქართველოში გაიმართება უკვე ძველი ამბავია. ჩვენთან ერთად, თანამასპინძელი რუმინეთი იქნება.
მანამდე კი 2021 წლის კონტინენტის პირველობაა, რომელსაც ასევე ორი თანაზიარი ქვეყანა ეყოლება – უნგრეთი და სლოვენია. პანდემიას რომ მსოფლიო თავდაყირა არ დაეყენებინა და ძველი ცხოვრება იყოს, აღნიშნული ტურნირიც გეგმის მიხედვით ივნისის თვეში უნდა გამართულიყო, ახლა კი ის ორ ნაწილად ჩატარდება.
უეფას გადაწყვეტილებით, 24-31 მარტს ჯგუფური ეტაპის მატჩები ჩათამაშდება, ხოლო 31 მაისიდან 6 ივნისამდე პლეიოფები და შესაბამისად ფინალი.
წლევანდელი ევროპის ჩემპიონატში 16 გუნდი მიიღებს მონაწილეობას. სამწუხაროდ მათ შორის არ არის საქართველოს ნაკრები, თუმცა ტურნირი უჩვენოდ მაინც არ ჩაივლის. ამ უმნიშვნელოვანეს ტურნირს სხვებთან ერთად ქართველ მსაჯთა ბრიგადაც მოემსახურება.
ფიფას მეორე კატეგორიის მსაჯ გიორგი ყრუაშვილს ზაზა ფიფია და ლევან ვარამაშვილი დაეხმარებიან, თუმცა ეს ყველაფერი არ არის. ევროპის ჩემპიონატზე ასევე იმუშავებს ქართველი დელეგატი ვახტანგ ბზიკაძე. აქამდე მსგავსი რანგის შეჯიბრზე ამ სტატუსით დავით პეტრიაშვილს და უმცროს ნოდარ ახალკაცს უმუშავიათ.
