2017 წელს, საქართველოს ნაკრები ქუთაისში ბელარუსს ამხანაგურად ეთამაშა. ის მატჩი ფრედ (2:2) დასრულდა, მაგრამ იმ დღეს ტემპერატურის დუღილი სტადიონს მიღმა უფრო იყო, ვიდრე უშუალოდ თამაშზე. ქართველ გულშემატკივართა და ზოგადად მოქალაქეთა გარკვეული ნაწილი გურამ კაშიას ნაკრებში ყოფნას აპროტესტებდა.
ხალხის აღშფოთება კი ქართველი ფეხბურთელის მიერ LGBT სამკლაურის გაკეთებამ გამოიწვია, რომელიც გურამ კაშიამ „ვიტესში“ თამაშის დროს შეიბა. იმხანად ხომ ის არნემული კლუბის კაპიტანი იყო და გუნდსაც გასახდელიდან მოედანზე ცისარტყელას ფერებში გადაწყვეტილი ლენტშებმული გაუძღვა. ამის გამო, საქართველოში ვითარება იმდენად დაიძაბა, რომ ნაკრებიდან მოკვეთას ვინ დაეძებს, ადამიანთა აგრესიულად განწყობილი ჯგუფი მას ფიზიკურად გასწორებითაც ემუქრებოდნენ.
მოკლედ, ეს უსიამოვნო ინციდენტი იმად გავიხსენეთ და ამხელა შესავალი იმიტომ გავაკეთეთ, რომ ახლახან უეფამ ფილმი გადაიღო სახელწოდებით – „აღშფოთებულები – ფეხბურთის პრობლემების დისკრიმინაცია“, რომელშიც გურამ კაშიაც მონაწილეობს. ფილმი რასისტულ შემთხვევებზე და ფეხბურთში მომხდარ დისკრიმინაციაზეა და მასში არაერთი ცნობილი ადამიანი ჩანს. მათ შორის ჟოზე მოურინიო, კალიდუ კულიბალი, გულიტი, პოლ პოგბა და სხვები.
ფილმში, საქართველოს ნაკრების ვიცე-კაპიტანი იხსენებს თუ რა რეაქცია მოჰყვა მაშინ მის სამშობლოში LGBT სამკლაურის შებმას.
„ცხოვრებაში ბევრი რამ ხდება. კარგიც და ცუდიც. ხანდახან ცდილობ, მაგრამ სწორი ნაბიჯის გადადგმა ადვილი არ არის. დიდი ხნის მანძილზე ამ თემასე საუბარს თავს ვარიდებდი, შესაძლოა შენი კონკრეტული გადაწყვეტილებით ან მოქმედებით არაერთ ადამიანს გული დაწყვიტო, მაგრამ მთავარია ამით შენი ქვეყანა უფრო განვითარდეს“ – ამბობს გურამ კაშია.
33 წლის ფეხბურთელი ამჟამად უგუნდოდაა. მან და ვაკო ყაზაიშვილმა ამერიკული „სან ხოსე“ დატოვეს და ახალი გუნდის ძიებაში არიან.
