ბენუა პერი – ჩოგბურთის ქომაგთათვის უცხო კაცი არ არის, თუმცა მის ქცევებსა და ყოფაქცევაზე რა მოგახსენოთ.
ვეტერანი ფრანგი ჩოგბურთელი კორტზე დიდი დისციპლინით არასოდეს გამოირჩეოდა და ხშირად გახვეულა სკანდალებშიც. არც ისე დიდი ხნის წინ ასე მოხდა ბარსელონას პრესტიჟულ ტურნირზეც, სადაც რაფაელ ნადალმა იჩემპიონა.
ბენუა პერი მეორე წრის შეხვედრაში მთავარი მსაჯის საკამათო გადაწყვეტილებამ იმდენად გააბრაზა, რომ მას პირდაპირ შეაფურთხა. ბუნებრივია, პერი ტურნირიდან მომენტალურად მოიხნსა, თუმცა ამით ყველაფერი არ ამოწურულა. ბენუა პერის სანქციები სამშობლოშიც დაუწესეს. ცუდი ყოფაქცევის გამო ის ეროვნული ნაკრებიდან გარიცხეს და ვერც ტოკიოს ოლიმპიადაზე იასპარეზებს.
„ჩვენ შეშფოთებულები ვართ ბენუა პერის ქმედებით. ამიტომაც მივიღეთ გადაწყვეტილება ის ოლიმპიური გუნდიდან გავრიცხოთ და ტოკიოში მის ადგილსაც სხვა დაიკავებს“ – ნათქვამია საფრანგეთის ჩოგბურთის ფედერაციის განცხადებაში.
ამასობაში, საყვედურმა არ დაახანა სპონსორებისგანაც. ჩოგნების მწარმოებელმა უმსხვილესმა კომპანია Babolat-მა სპეციალური განცხადება გაავრცელა, სადაც ნათქვამია, რომ ბენუა პერისთან თანამშრომლობის საკითხს აუცილებლად გადახედავენ.
„პერის ქმედებას არანაირი გამართლება არ აქვს. ჩვენ მას შევატყობინეთ, რომ საქციელს არ ვუწონებთ და მომავალი თანამშრობლობის საკითხიც კითხვის ნიშნის ქვეშ დგას“ – ამბობენ Babolat-ში.
თავად ბენუა პერის კი ეს ყველაფერი ვგონებ დიდად არ ანაღვლებს. უფრო მეტიც – მისი თქმით, ჩოგბურთისგან სიამოვნებას ვეღარ იღებს.
„ადრე გაცილებით დიდ ადრენალინს ვიღებდი, ახლა კი ჩოგბურთის თამაში დიდად აღარ მიზიდავს. ეს იმას არ ნიშნავს, რომ კარიერას დღესვე ან უახლოეს ხანებში დავასრულებ, მაგრამ არც ამას გამოვრიცხავ“ – ამბობს 31 წლის ფრანგი ჩოგბურთელი.
შეგახენებთ, მადრიდის მასტერსზე, რომელიც 2 მაისს დაიწყო, პირველ წრეში ნიკოლოზ ბასილაშვილის მეტოქე სწორედ ბენუა პერი იქნება.
ფრანგ ჩოგბურთელს კარიერაში 3 ტიტული აქვს მოგებული. ამჟამად ის რეიტინგის 35-ე ნომერია, ხოლო სუკეთესო მაჩვენებელი 2016 წელს ჰქონდა, როდესაც მსოფლიოს მე-18 ჩოგანი იყო.
