ბოლო პერიოდში საფეხბურთო სამყაროს მთავარი თემა ევროპუს სუპერლიგა და მის ირგვლივ ელვის სისწრაფით განვითარებული მოვლენებია. აღნიშნულ პროექტს დიდი ვნებათაღელვა მოჰყვა და უამრავი კრიტიკოსი გამოუჩნდა.
სუპერლიგის შექმნიდან 24 საათში იქ გაწევრიანებულმა გუნდებმა ეტაპობრივად მისი დატოვება დაიწყეს. შესაბამისად პროექტის განხორციელებაც შეწყდა.
ევროპის სუპერლიგის და მადრიდის „რეალის“ პრეზიდენტი ფლორენტინო პერესი აღნიშნულ საკითხთან დაკავშირებით კომენტარს აკეთებს.
„სუპერლიგა არ მომკვდარა, ის მოლოდინის რეჟიმშია. პროექტზე მუშაობა ისევ გაგრძელდება. იმ 12 დამფუძნებელმა კლუბმა ერთ კონტრაქტს მოაწერა ხელი. მინდა ხაზი გავუსვა, რომ არცერთ გუნდს ჯერ პროექტის დატოვების გამო ჯარიმა არ გადაუხდია. ამიტომაც, ოფიციალურად ჯერ სუპერლიგიდან არავინ გასულა.
იმ 6 ინგლისური გუნდიდან ერთი ბოლომდე არ იყო დარწმუნებული სუპერლიგის საჭიროებაში და ვფიქრობ მან იმოქმედა დანარჩენ სხვებზე. ძალიან სამწუხაროა. შესაძლოა, ჩვენ ვერ ავუხსენით კლუბებს კარგად სუპერლიგის მნიშვნელობა“ – ამბობს ფლორენტინო პერესი.
