საქართველოს კალათბურთის ფედერაციის პრეზიდენტმა პაატა გურასპაულმა საქართველოს საზოგადოებრივი მაუწყებლის გადაცემაში “ტაიმ აუტი” მოახლოებულ სანაკრებო მატჩებზე და თორნიკე შენგელიას ჩამოსვლის საკითხზე ისაუბრა.
“ვიცით, რომ დაშავდა გიორგი ცინცაძე, თუმცა, საბედნიეროდ, მისი ტრავმა არ აღმოჩნდა ისეთი მძიმე, როგორც თავდაპირველად ვვარაუდობდით. გიორგი უკვე რამდენიმე თვეში დაიწყებს ვარჯიშს და ძალიან დიდი იმედი მაქვს, რომ ევროპის ჩემპიონატისთვის და შეიძლება, უფრო ადრეც, მწყობრში იქნება. კიდევ ერთი დანაკლისი გვაქვს დუდა სანაძის სახით, რომელმაც სერბეთში კოვიდი გადაიტანა, გამოკვლევების შემდეგ კი, გულის არითმია გამოუვლინდა. დუდას ექიმებმა გარკვეული პერიოდი დასვენება ურჩიეს და წესით, აქტიური კარიერის განახლება მალევე უნდა მოახერხოს. აშშ-ში მოთამაშე კალათბურთელების სეზონის განმავლობაში ჩამოსვლა შეუძლებელია. ნაკრებში აუცილებლად იქნება თორნიკე შენგელია, რომელმაც ეს საკითხი მოსკოვის ცსკა-სთან კონტრაქტის გაფორმების დროს შეათანხმა, თუმცა, მას საკმაოდ რთული გზა ექნება გასავლელი. 25 ნოემბერს ცსკა ევროლიგის ეგიდით მიუნხენის ბაიერნს უმასპინძლებს, 16 საათში კი უკვე საქართველოს ნაკრების თამაში აიღებს სტარტს. თორნიკემ ადგილზე მოაგვარა ყველა საკითხი, ჩვენც ყველაფერი გავაკეთეთ და ის თბილისში ჩარტერული რეისით ჩამოვა. შენგელია ჩვეული თავდადებით დაუხვდება მეტოქეებს, ჩვენ კი, როგორც უკრაინასთან, ასევე ესპანეთთან მხოლოდ მოსაგებად გავალთ. ნაკრებში სათამაშოდ ჩამოვა ესპანეთში მოთამაშე ყველა ქართველი კალათბურთელი. მათ შორის, თად მაკფადენი, კონერ ფრენკამპი კი, მოგეხსენებათ, ევროლიგაში მოთამაშე სანკტ-პეტერბურგის ზენიტში ირიცხება და მისი გამოძახება შეუძლებელი იყო”, – განაცხადა გურასპაულმა.
