საქართველოს ნაკრების ნახევარმცველმა ოთარ კიტეიშვილმა, ავსტრიის ბუნდესლიგის მე-18 ტურში სერიოზული ტრავმა მიიღო. თავდაპირველი ვერსიით, თითქოს დაზიანება ძალიან მძიმე არ უნდა ყოფილიყო, მაგრამ როგორც გრაცის „შტურმის“ პრესსამსახური იუწყება, ქართველი ფეხბურთელის ტრავმა მოსალოდნელზე რთული აღმოჩნდა.
„ჩვენ გუნდში მდგომარეობა რთული ხდება, რაც არაერთი ფეხბურთელის ტრავმით არის განპირობებული. ბოლო პერიოდში რამდენიმე ფეხბურთელი დაშავდა, რომელთა შორისაც არის ქართველი ლეგიონერი ოთარ კიტეიშვილი.
წინასწარი გამოკვლევების მიხედვით, კიტეიშვილს მარცხენა ფეხის კუნთები იმაზე მეტად აქვს დაზიანებული, ვიდრე ვვარაუდობდით. ოთარს გარკვეული პაუზის აღება მოუწევს, ვიდრე მოედანს დაუბრუნდება“ – ნათქვამის „შტურმის“ ოფიციალურ განცხადებაში.
სამწუხაროდ, ოთარ კიტეიშვილმა ტრავმის გამო 12 ნოემბერს საქართველოს ნაკრების ყველაზე მნიშვნელოვანი დაპირისპირება გამოტოვა. ახლა კი როგორც ირკვევა ის ჯვაროსნებს ვერც მარტის სანაკრებო მატჩებში დაეხმარება.
