იტალიური „მილანის“ აკადემიის აღზრდილმა ფეხბურთელმა სიცოცხლე თვითმკვლელობით დაასრულა. 20 წლის სეიდ ვისინმა დასამშვიდობებელი წერილი დატოვა და სუიციდს მიმართა.
იტალიურმა მედიამ ფეხბურთელის ეს ქმედება უმალ რასიზმს მიაწერა, რადგან თავად ვისინმა თვითმკვლელობის წინ დატოვებულ ჩანაწერში აღნიშნა, რომ კანის ფერის გამო ხშირად შეურაცხყოფას აყენებდნენ და ვეღარ გაუძლო.
სეიდ ვისინი ეთიოპიაში დაიბადა, თუმცა 7 წლის ასაკში ის ერთ-ერთმა იტალიურმა ოჯახმა იშვილა. ის „მილანის“ აკადემიის აღზრდილი გახლდათ, მაგრამ საფეხბურთო კარიერა ვერ აეწყო და ბურთის გორებას 20 წლისა შეეშვა. ამის შემდეგ ვისინი ერთ-ერთ რესტორანში მიმტანად მუშაობდა.
ფეხბურთელის აღმზრდელი მამა რასიზმთან დაკავშირებით გავრცელებულ ინფორმაციას ჭორს უწოდებს. „ჩემი შვილის სიკვდილის მიზეზი რაიმე სახის დისკრიმინაცია არ ყოფილა. ჟურნალისტებს ვთხოვ არასწორ ინფორმაციას ნუ ავრცელებენ. ამ ეტაპზე ჯერ არ გვაქვს პასუხი თუ რატომ ჩაიდინა მან ის რაც ჩაიდინა. ჩვენს ქალაქში ჩემი შვილი ყველას უყვარდა“ – ამბობს უფროსი ვისინი.
სეიდ ვისინი „მილანის“ აკადემიაში სწავლის და ვარჯიშის პერიოდში ჯანლუიჯი დონარუმასთან ერთ ოთახში ცხოვრობდა. ის „ბენევენტოს“ ახალგაზრდულ გუნდში თამაშობდა, თუმცა როგორც ზემოთ ავღნიშნეთ საფეხბურთო კარიერა ნაადრევად დაასრულა.
