ნიკოლოზ ბასილაშვილი ATP-ის ტურნირების ფინალში მეექვსედ გავიდა. სამჯერ მან გამარჯვება შეძლო და იმედია ქართველი ჩოგბურთელის ჯილდოების რიცხვს დოჰას ტურნირის საჩემპიონო თასიც შეემატება.
ფინალში ჩვენებური მეჩოგნის მეტოქე რობერტო ბაუტისტა-აგუტი იქნება, რომელსაც დოჰას პრესტიჟული ტურნირი 2019 წელს მოგებული აქვს.
ნიკოლოზ ბასილაშვილი ფინალში რთულ დაპირისპირებას ელის.
„რთული პერიოდი გავიარე პანდემიის დროს. სათანადო დონეზე ვერ გამოვიყურებოდი და ეს ძალიან მწყინდა, თუმცა მოხარული ვარ, რომ კრიზისს ნელ-ნელა ვლახავ.
ფინალში გასვლა ნებისმიერ ტურნირზე ძალიან სასიამოვნო შეგრძნებაა, მითუფრო მსგავსი დონის პრესტიჟულ შეჯიბრზე. დიდი ხანია ტრიბუნებზე გულშემატკივრები არ გვინახავს და მახარებდა, რომ დოჰაში ეს ნაწილობრივ შეიცვალა. ქომაგების თანდასწრებით თამაში ნამდვილად კარგი შეგრძნებაა. იმედი მაქვს, რომ სამყარო ნორმალურ რეალობას მალე დაუბრუნდება.
რაც შეეხება ხვალინდელ ფინალს, ძალზედ რთული მოწინააღმდეგე მეყოლება. რობერტო ბაუტისტა-აგუტს დოჰას ტურნირი ერთხელ მოგებული აქვს და ეს ბევრ რამეზე მეტყველებს. ორი წლის წინ მასთან თამაში მომიხდა და მაშინ დავმარცხდი. ის მაღალი დონის ჩოგბურთელია.
მეტი კონცენტრაცია მმართებს. ვეცდები თამაშისგან სიამოვნება მივიღო“ – აღნიშნა ნიკოლოზ ბასილაშილმა მატჩისშემდგომ კომენტარში.
