კვიპროსის ჩემპიონატის მე-11 ტურის მატჩში “აპოელმა” შინ “ომონიას” უმასპინძლა და ანგარიშით 4:2 დაამარცხა.
აღნიშნულ მატჩს საქართველოს ნაკრების ფეხბურთელები გურამ კაშია და ნიკა კაჭარავა ესწრებოდნენ.
გურამმა გიორგი ქვილითაიას გოლი საკმაოდ ემოციურად აღნიშნა, ნიკა კაჭარავა კი უბრალოდ იღიმოდა.
“ანორთოსისის” ფანებში ნიკა კაჭარავას ღიმილმა დიდი გაღიზიანება გამოიწვია.
ქართველმა ფეხბურთელმა სოციალურ ქსელში საინტერესო სთორი გაავრცელა, სადაც ის კვიპროსული გუნდის ფანებს ბოდიშს უხდის:
“მინდა, პატარა განცხადება გავაკეთო დღევანდელ ვიდეოსთან დაკავშირებით. საქართველოს ნაკრებში ჩემს თანაგუნდელ და კაპიტან გურამ კაშიასთან ერთად ვიყავი აპოელისა და ომონიას შეხვედრაზე და ჩემმა მეგობარმა ვიდეო გადაიღო, რომელშიც ქვილითაიას გოლს აღნიშნავს. მე ამაზე უბრალოდ გამეღიმა, რადგან ბავშვივით ზეიმობდა. არასდროს აღვნიშნავ მეტოქეების გოლებს, ყოველთვის პატივს ვცემ ანორთოსისის გულშემატკივრებს და მუდამ ვგრძნობ თქვენს მხარდაჭერას. ამ ვიდეოს გამო თუ ვინმე განაწყენდა, მინდა, ბოდიში მოგიხადოთ”, – განაცხადა ნიკა კაჭარავამ.
სხვადასხვა მედიაში ინფორმაცია ვრცელდება, რომ ნიკასა და კლუბის ხელმძღვალებს შორის შეხვედრა შედგა, რის შედეგადაც გადაწყდა, რომ ქართველი ფეხბურთელი “ანორთოსისს” დატოვებს.
