არგენტინის ეროვნული ნაკრები კოპა ამერიკაზე გამოსვლას იწყებს. თბილისის დროით 15 ივნისს, შუაღამისას, სკალონის გუნდი ჩილეს ნაკრებს დაუპირისპირდება. „ალბისელესტეს“ 33 წლის კაპიტანმა ლიონელ მესიმ ნაკრებში არსებულ ვითარებასა და გუნდში თავის როლზე ისაუბრა.
„ნაკრები არასდროს ყოფილა ჩემზე დამოკიდებული. ყოველთვის ვცდილობთ ერთიანი, ძლიერი გუნდით წავრსდგეთ. თუ გუნდურად ძლიერი არ ვიქნებით, გამარჯვება და მიზნის მიღწევა გაგვიძნელდება.
ვფიქრობ, ამჟამად ძლიერი სწორედ გუნდურად ვართ. ფეხბურთელების უმეტესობა ერთად დიდი ხნის განმავლობაში მუშაობდა. გვერდიგვერდ კოპა ამერიკაზეც გვითამაშია და კარგი გამოცდილებაც გვაქვს. ვფიქრობ, სწორ გზაზე ვდგავართ.
ის, რაც არგენტინის ნაკრებში ხდება, ჩემთვის ყოველთვის განსაკუთრებულია – ამხანაგური მატჩი იქნება ეს, საკვალიფიკაციო ეტაპი, კოპა ამერიკა, თუ მსოფლიოს ჩემპიონატი… ვერასდროს წარმოვიდგენდი, თუ ამდენ თამაშს ჩავატარებდი, თუმცა ყოველთვის ბოლომდე ვიხარჯებოდი“, – ამბობს ბარსელონას თავდამსხმელი.
ლიონელ მესი არგენტინის ეროვნული ნაკრების ღირსებას 2005 წლიდან იცავს და 2014 წელს გუნდთან ერთად მსოფლიოს ვიცე-ჩემპიონიც. ამის გარდა, 33 წლის ფეხბურთელმა სამჯერ კოპა ამერიკის ფინალშიც ითამაშა, თუმცა სამივე შეხვედრაში დამარცხდა. არგენტინელ სუპერვარსკვლავს ნაკრების მაისურით ჩატარებულ 143 მატჩში 72 გოლი აქვს გატანილი.
