მოთმინების ფიალა აივსო. დორტმუნდის „ბორუსიამ“ ლუსიენ ფავრს კარისკენ მიუთითა. შვეიცარიელ სპეციალისტს წყალი დიდი ხანია შემდგარი ჰქონდა, თუმცა გერმანული გუნდის ბოსებმა ის რამდენჯერმე დაინდეს, ახლა კი თანამდებობა დაატოვებინეს.
ბოლო წვეთი, ბუნდესლიგაში, „შტუდგარტთან“ შერცხვენა გახლდათ. დორტმუნდელებმა საკუთარ მოედანზე 1:5 წააგეს და სატურნირო ცხრილში მეხუთე ადგილამდე ჩამოქვეითდნენ. მართალია, ჩემპიონთა ლიგის ჯგუფური ეტაპი „ბორუსიამ“ პირველ ადგილზე დაასრულა და უკან „ლაციო“ „ბრიუგე“ და „ზენიტი“ ჩამოიტოვა, მაგრამ გერმანიის ჩემპიონატში ასეთი ფიასკო, თან შინაურ კედლებში გულზე მწარედ მოხვდათ.
ინფორმაცია ლუსიენ ფავრის გათავისუფლებასთან დაკავშირებით „ბორუსიას“ ოფიციალურმა საიტმაც დაადასტურა. სიმართლე ითქვას, ფავრის გაშვება ჯერ კიდევ შარშან სურდათ. „ბორუსიას“ ხემლძღვანელობა და ქომაგები მას გუნდის არასტაბილური თამაშის გამო აკრიტიკებდნენ, მაგრამ ყოველ ჯერზე ის შველოდა, რომ ბოსებს სათანადო შემცვლელი არ ჰყავდათ.
ლუსიენ ფავრი, დორტმუნდის „ბორუსიას“ 2018 წლიდან წრთვნიდა და მხოლოდ გერმანიის სუპერთასის მოგება შეძლო.
