ორივე თანამედროვე ჩოგბურთის ვარსკვლავია. თუმცა რატომ მარტო თანამედროვე? გადაუჭარბებლად შეიძლება ითქვას, რომ ისინი მთლიანად ჩოგბურთის ისტორიის დიდი ეპოქის შემოქმედნი არიან.
რაფაელ ნადალი და როჯერ ფედერერი. ორი დიადი ჩოგბურთელი, რომელთა დაპირისპირებებიც მრავალი წელია გულშემატკივარს აღაფრთოვანებს და ნირვანაში ამყოფებს. 20 დიდი მუზარადი. განა შემთხვევით მიიღწევა ეს უნიკალური შედეგი? მათ ეს შეძლეს. ესპანელმა მატადორმა და რკინის როჯერმა დიდი სლემის ტურნირები 20-20-ჯერ მოიგეს.
აი, რას ფიქრობს რაფაელ ნადალი როჯერ ფედერერზე და მომავალ სეზონში შვეიცარიელის დაბრუნებაზე.
„თუ როჯერი ფიზიკურ კონდიციებს ბოლომდე აღიდგენს და ტრავმაც აღარ შეაწუხებს, მაშინ ის აუცილებლად შეძლებს ისე დაბრუნდეს, როგორც მას ეკადრება. მას დასამტკიცებელი აღარაფერი აქვს. ის უდიდესია და თუ ჯანმრთელობა ხელს შეუწყობს, აუცილებლად მოახერხებს მსხვილ ტურნირებზე წარმატების მიღწევას.
არ ვიცი როდემდე გაგრძელდება როჯერის კარიერა, მაგრამ ჩემი სურვილია კვლავ ის ფედერერი ვიხილო კორტზე, როგორიც ყველას ახსოვს და აბედნიერებს. ვფიქრობ, ჩემი და როჯერის სამომავლო დაპირისპირებები სარგებელს მხოლოდ ჩოგბურთს, ATP ტურს და მის განვითარებას მოუტანს“ – აღნიშნავს რაფაელ ნადალი.
რაფაელ ნადალმა 2020 წლის სეზონი რეიტინგში მეორე ადგილზე დაასრულა. მან აკაპულკოს ტურნირის და როლან გაროსის მოგება შეძლო.
რაც შეეხება როჯერს, ის იანვრის შემდეგ კორტზე აღარ გამოჩენილა. ფედერერი დაბრუნებას ავსტრალიის ღია პირველობაზე აპირებს.
