ქართული სპორტის, განსაკუთრებით კი წყალბურთის ქომაგთა ყურადღება ბუდაპეშტისკენ არის მიმართული, სადაც ჩემპიონთა ლიგის ჯგუფური ეტაპის დასკვნითი მატჩები მიმდინარეობს.
ის რომ გუნდურ სახეობაში, ასეთი პრესტიჟული ტურნირის ჯგუფურ ეტაპზე საქართველო აქამდე არასოდეს ყოფილა წარმოდგენილი არახალი ამბავია. ზედიზედ მეორე წელია კი ამას წყალბურთში თბილისი „დინამო“ ახერხებს.
მიმდინარე სეზონში, აქამდე გამართული 7 მატჩიდან, „დინამომ“ მხოლოდ ერთი მოიგო და სატურნირო ცხრილშიც ბოლო ადგილზე იმყოფებოდა, თუმცა ჯგუფიდან გასვლის შანსს მაინც ინარჩუნდებდა. დღეს კი ქართველმა წყალბურთელებმა უმნიშვნელოვანესი გამარჯვება მოიპოვეს და ისტორიის დაწერას კიდევ უფრო მიუახლოვდნენ.
„დინამოს“ მეტოქე მონტენეგროული „იადრანი“ გახლდათ. წყალბურთში კარგად ჩახედულ ქომაგს ეცოდინება მონტენგროს სპორტის ამ სახეობაში რა უდიდესი ტრადიციები გააჩნია. რაც შეეხება „იადრანს“ ის ქვეყნის 14-გზის ჩემპიონია და თავის დროზე ჩემპიონთა ლიგაც მოუგია.
მოკლედ, თბილისის „დინამო“ ძლიერ მეტოქესთან მთელი მატჩის მანძილზე დამაჯერებლად გამოიყურებოდა და დამსახურებულადაც გაიმარჯვა – 13:10. აქვე ისიც ვთქვათ, რომ ის ერთი გამარჯვებაც „დინამოს“ სწორედ „იადრანთან“ ჰქონდა მოპოვებული. მაშინ საქართველოს ჩემპიონმა მონტენეგროს საუკეთესო გუნდს 11:8 აჯობა.
21 აპრილს, „დინამოს“ მეტოქე გერმანული „ვასპო ჰანოვერი“ იქნება და გამარჯვების შემთხვევაში ჯგუფის ოთხეულში მოხვდება, რაც იმას ნიშნავს, რომ პლეიოფის საგზური ანუ საუკეთესო 8 გუნდში ადგილის დაბევება ჯიბეში ედებათ.
