საქართველოს ფუტსალის ეროვნული ნაკრები ევრო2022-ის ჯგუფური ეტაპის პირველი მატჩისთვის ემზადება. ავთანდილ ასათიანის გუნდმა 20 იანვარს, გრონინგენის ვილდერფანკის სპორტულ დარბაზში ივარჯიშა. აღნიშნულ დარბაზი სწორედ იმ გუნდებს ეთმობათ, რომლებსაც ოფიციალური მატჩები გრონინგენში აქვთ დაგეგმილი.
საწვრთნელი პროცესი საათნახევარი გაგრძელდა და მასში 17 ფეხბურთელი მონაწილეობდა. ამ ეტაპისთვის ეროვნული ნაკრები სადებიუტო მატჩისთვის სრული დატვირთვით ემზადება და ყველა მოთამაშე ჯანმრთელადაა.
ვარჯიშის დასრულების შემდეგ, ჩვენი გუნდის მთავარმა მწვრთნელმა მზადების პროცესზე და მოახლოებულ შეხვედრაზე ისაუბრა:
„დღეს დიდი დრო დავუთმეთ ტაქტიკურ მომზადებას, განსაკუთრებით სტანდარტულ მდგომარეობაზე გვქონდა აქცენტი გაკეთებული. 5/4-ზე შეტევა, 5/4-ზე დაცვა. ვფიქრობ, რომ მზად ვართ ამ ისტორიული მატჩისთვის. თუ როგორ მოვემზადეთ, ამას თამაში გასცემს პასუხს. ბიჭებს გათავისებული აქვთ რამდენად მნიშვნელოვანი მატჩი გველოდება. გუნდში ძალიან კარგი განწყობაა და მახარებს. ისტორიული თამაშის განწყობა დაძაბულობაში არ გადადის, რაც ფსიქოლოგიურად ძალიან კარგია. საწყისი წუთები მნიშვნელოვანი იქნება. ხვალ, იმ ტაქტიკურ დავალებებზე ვიმუშავებთ, რაც ასეთი თამაშების წინ ბოლო ვარჯიშებზე კეთდება. ვთვლი, რომ მზად ვართ 22 იანვარი სიმბოლურ თარიღად ვაქციოთ“, – განაცხადა ავთანდილ ასათიანმა.
შეგახსენებთ, რომ საქართველოს ფუტსალის ნაკრები ევროპის ჩემპიონატზე პირველ შეხვედრას ხვალ, აზერბაიჯანის ნაკრების წინააღმდეგ გამართავს.
