ევროპული ფეხბურთის მმართველ ორგანოს დიდი თავისტკივილი გაუჩნდა. არა, წელიწადზე მეტია, ცნობილ მიზეზთა გამო მთლიანად სპორტია საგონებელში, მაგრამ ამჯერად კონკრეტულ ამბავს შევეხებით, რომელსაც უეფა და მისი უმთავრესი საკლუბო ტურნირი შეეჩეხა.
საქმე თებერვლის საპლეიოფო მატჩს ეხება. ფეხბურთის ქომაგებს ეცოდინებათ, რომ ჩემპიონთა ლიგაზე, ერთ-ერთი მერვედფინალური წყვილი „ლაიპციგმა“ და „ლივერპულმა“ შეადგინა. მატჩები დიდი ალბათობით უმაყურებლოდ გაიმართება და ამას უკვე შეგუებულნი ვართ, თუმცა გერმანულ-ინგლისური გუნდების ჯახს მსხვილი კითხვის ნიშანი დააჯდა.
მოკლედ, პანდემიის პრევენციის გამო, გერმანიის მთავრობამ დიდ ბრიტანეთს 17 თებერვლამდე საზღვრები ჩაუკეტა, „ლაიპციგსა“ და „ლივერპულს“ შორის პირველი საპლეიოფო დაპირისპირება კი 16 თებერვალს არის დაგეგმილი. როგორც ავღნიშნეთ, გერმანიის ხელისუფლების გადაწყვეტილებით ნისლიანი ალბიონიდან ფრენები აკრძალულია, რაც იმას ნიშნავ, რომ „ლივერპულის“ შემთხვევაში ან გამონაკლისი უნდა დაუშვან ან სხვა ვარიანტები განიხილონ.
უეფა ორ ვარიანტზე ფიქრობს. მატჩი ნეიტრალურ მოედანზე გაიმართოს ან პირველი დაპირისპირების მასპინძელი შეიცვალოს – ჯერ „ლაიპციგი“ გაემგზავროს „ენფულდზე“, ხოლო იურგენ კლოპის შეგირდები გერმანიში 10 მარტს ჩავიდნენ. იმედია, იმ დროისთვის შეზღუდვები მოხსნილი იქნება.
დაველოდოთ მოვლენების განვითარებას. გამოსავალი ნებისმიერ შემთხვევაში მოსაძებნია.
