ორ თვეზე მეტი გავიდა, თუმცა წლებიც თვალის დახამხამებაში გაირბენს, მაგრამ დიეგო მარადონა დავიწყებას არასოდეს მიეცემა. დიადმა არგენტინელმა ეს წუთისოფელი დატოვა, მაგრამ ლეგენდები არასოდეს კვდებიან, ისინი მილიონობით ადამიანის გულებში მუდამ ცოცხლობენ.
დიეგოს გარდაცვალება უხმაუროდ ვერ ჩაივლიდა. ის მილიონობით ადამიანმა გულწრფელად დაიტირა, მაგრამ ასეთ დროს გამოძიებაც იწყება, მითუფრო როდესაც საქმე ისეთ პერსონას ეხება, როგორიც დიდებული არგენტინელი ათიანი იყო.
ეჭვები კი მის ექიმზე, ლეოპალდო ლუკესზე გაჩნდა. რატომაღაც ის არაკეთილსინდისიერ დამოკიდებულებაში დიეგოს ქალიშვილმა ამხილა და გამოძიებას ჩვენებაც მისცა. ამის შემდეგ, სამართალდამცავებმა ექიმი სახლი და საავადმყოფო გაჩხრიკეს, საიდანაც გარკვეული დოკუმენტაცია ამოიღეს, ხოლო კომპიუტერები დალუქეს და განყოფილებაში გადაიტანეს. ლუკესს ასევე ჩამოერთვა მობილური ტელეფონი.
ახლახანს კი არგენტინის პროკურატურამ სწორედ ლუკესის მობილური ტელეფონის აუდიო ჩანაწერების ფრაგმენტები გაასაჯაროვა, სადაც ის ფსიქიატრ აგუსტინა კოსაჩოვს მარადონას გარდაცვალების დღეს ესაუბრება.
„შეატყობინეთ ყველას. მის ახლობლებს, ალბათ პრესასაც. როგორც ჩანს ის მოკვდა. მე უკვე გზაში ვარ, მალე მოვალ“ – ისმის ლუკესის ხმა.
„სასწრაფომ მოსვლა დააგვიანა. ამიტომაც მოგვიხდა მათ გამოჩენამდე ჩვენ ეს ხელით გაგვეკეთებინა. ახლა ისინიც აქ არიან და ცდილობენ გააცოცხლონ“ – პასუხობს კოსაჩოვი.
„წარმოდგენა არ მაქვს რა შეიძლებოდა გაეკეთებინა. როგორც ჩანს მას გული გაუჩერდა. მას ზედმეტი წონა ჰქონდა. მსუქანი კაცი მოკვდა. მოვდივარ იდიოტო“ – ეუბნება ლუკე.
„ჩვენ ოთახში პირველები შევედით. მას ხელოვნურ სუნთქვას ვუტარებდით. შემდეგ სასწრაფოც მოვიდა, მე ოთახიდან გამოვედი და მათ განაგრძეს“ – პასუხობს კოსაჩოვი.
დიეგო მარადონას გარდაცვალების რეალური მიზეზის დასადგენად გამოძიება ალბათ კიდევ დიდხანს გაგრძელდება. არ გამოვრიცხოთ, რომ ამ ჩანაწერების გასაჯაროვების შემდეგ ლუკეც და კოსაჩოვიც მალე დაკითხვაზე გამოიძახონ და ჩვენება ჩამოართვან.
