რუსეთის უკრაინაში შეჭრის პროტესტის ნიშნად საქართველოს ნაკრების კაპიტანმა, თორნიკე შენგელიამ მოსკოვის ცსკა დატოვა და ახლა ესპანეთში იმყოფება.
აღნიშნული საკითხის შესახებ, მოსკოვის ცსკა-მ ოფიციალური განცხადება გაავრცელა.
“ოჯახური და პირადი მიზეზებით, რაც რუსეთსა და უკრაინას შორის შექმნილი სიტუაციით არის გამოწვეული და ასევე მოვლენათა შესაძლო განვითარების გამო, ცსკა დატოვეს თორნიკე შენგელიამ და იფე ლუნდბერგმა. უახლოეს პერიოდში სამშობლოში დაბრუნდებიან მარიუს გრიგონისი და იოჰანეს ვოიგტმანი. ამ კალათბურთელების ქმედება კონტრაქტების პირობებისა და საკლუბო რეგლამენტის დარღვევაა, თუმცა, კლუბი თითოელი მოთამაშის პერსონალურ სიტუაციას პატივისცემით ეპყრობა. მათთან თანამშრომლობის სტატუსის განხილვა მაშინ მოხდება, როდესაც ევროპაში პოლიტიკური და სპორტული მდგომარეობა ნორმალიზირდება. ყველა სხვა კალათბურთელი მომავალი მატჩებისთვის მზადებას ჩვეულ რეჟიმში აგრძელებს. კლუბი აკვირდება მოვლენათა განვითარებას და ორიენტაციას იმ ორგანიზაციებისა და ტურნირების ხელმძღვანელებზე აკეთებს, რომელთა წევრიც არის”, – ვკითხულობთ ცსკას განცხადებაში.
შეგახსენებთ, რომ თორნიკე შენგელიამ მოსკოვის ცსკა-სთან 2020 წელს სამწლიანი კონტრაქტი გააფორმა. თორნიკეს რუსულ გუნდში გადასვლამ მაშინ ქართველ გულშემატკივარში დიდი კრიტიკა გამოიწვია.
ცნობისთვის, შენგელიას ცსკა-სთან კონტრაქტში ეწერა, რომ საქართველოს ნაკრებში ჩასვლაში ხელს არ შეუშლიდნენ.
ეს გადაწყვეტილება მაშინდელ კრიტიკას აუცილებლად გადაფარავს და მეტიც, თორნიკე ქართველი ხალხისგან დიდ პატივისცემას დაიმსახურებს.
