MMA-ს მებრძოლი, მირო ვანაძე, უკრაინის მოსახლეობას პურს უსასყიდლოდ ურიგებს. მირო ყოველ დილით თავის მეგობრებთან ერთად, 5 საათიდან იწყებს მზადებას ხალხის დასახმარებლად და მისი წყალობით, რამდენიმე ასეული ადამიანი სახლში პურით ბრუნდება.
მირომ, Batumelebi.ge-სთან ინტერვიუში განაცხადა, რომ ომში მიდის.
“ახლა მოხუცებს დავუტოვეთ საჭმელი… ისევ მოხალისე ვარ, მაგრამ რეზერვისტად ჩავეწერე უკვე, ალბათ, ამაღამ მეც ომში წავალ.
მარცხენა სანაპიროზე, სადაც მე ვცხოვრობ, ბლოკპოსტია და ალბათ იქ ვიქნებით. ყველას ეშინია, რადგან ვხედავთ, როგორ მიდიან ყველაფერზე რუსები. მაგრამ აქ ვინც არის, ჩემი აზრით, ყველა ბოლომდე იბრძოლებს თავისუფლებისთვის, ბოლომდე შეSწირავენ თავს
რუსული არმია მიზანმიმართულად ცდილობს პანიკის დათესვას. ჩვენი, მოხალისეების შეშინებაც სცადეს. დამირეკეს და კონკრეტულ მისამართზე მთხოვეს მისვლა, შემდეგ გაირკვა, რომ დივერსანტები იყვნენ.
მათ უნდათ, რომ პანიკა გააჩინონ, ფსიქოლოგიური შეტევაა არამხოლოდ ჯარზე, არამედ მოსახლეობაზე, ხელისუფლებაზე.
ყველაფერი დაცარიელებულია. ქუჩებში იშვიათად ჩნდება ვინმე, მაღაზიებშიც… თავშესაფრებშია ხალხი. ზოგიც მიდის, მაგრამ ქვეყნის დატოვებაც საფრთხეა უკვე… მოხუცები არიან მხოლოდ ალაგ-ალაგ კორპუსებში… შუქს არ ანთებენ, ისე არიან მარტო.
ბოლომდე დანაყრებასა და დესერტზე აქ აღარავინ ფიქრობს. მთავარია, მშიერი არ დარჩე, რომ გადარჩე.
უკვე ფრონტის წინა ხაზია ყველგან და არა მხოლოდ ის ადგილი, სადაც ისვრიან”, – ამბობს ქართველი MMA-ს მებრძოლი Batumelebi.ge-სთან ინტერვიუში.
