ლა ლიგის ბოლო ტურებში, კატალონიის „ბარსელონამ“ სათამაშო ხარისხი აშკარად გააუმჯობესა და თამაშების ერთისმიყოლებით მოგებაც დაიწყო. „ბალუგრანას“ გამოცოცხლება სატურნირო ცხრილზეც აისახა. ესპანეთის ჩემპიონატის ბოლო ტურში, „კამპ ნოუზე“ ბილბაოს ატლეტიკის დამარცხების შემდეგ, რონალდ კუმანის გუნდი მე-2 პოზიციაზე გადავიდა და უშუალო კონკურენტი, მადრიდის „რეალი“ უკან ჩამოიტოვა. მართალია „რეალს“ და „ბარსას“ 20 ტურის შემდეგ თანაბარი, 40-40 ქულა აქვთ, მაგრამ კატალონიელებს ბურთების შეფარდება უფრო უკეთესი აქვთ.
ბილბაოსთან მატჩში ლეო მესიმ მორიგი ფენომენალური საჯაირიმო შემოგვთავაზა და ბასკების კარში ულამაზესი გოლი გაიტანა. შესაბამისად, მესიმ გამარჯვებაში ლომის წვლილი დაიდო.
შეხვედრის დასრულების შემდეგ, კუმანმა საზოგადოებას არგენტინელი სუპერვარსკვლავის მიმართ მეტი პატივისცემის გამოჩენისკენ მოუწოდა:
„ჩვენთვის ძალიან ბევრს ნიშნავს კლუბში მსოფლიოს საუკეთესო ფეხბურთელის ყოფნა. მესის ბარსელონასთვის ძალიან ბევრი აქვს გაკეთებული, მაგრამ მისი მისამართით ბევრისგან ნეგატიური დამოკიდებულება იგრძნობა. ის ამას არ იმსახურებს. თქვენ პატივი უნდა სცეთ იმ ყველაფერს, რაც მესიმ „ბარსელონასთვის“ გააკეთა“, – აღნიშნა კუმანმა.
