ხვალ, საქართველოს ფეხბურთელთა ეროვნული ნაკრები ნიდერლანდების ნაკრებს ესტუმრება. აღნიშნულ შეხვედრასთან დაკავშირებით, ცოტა ხნის წინ ჩვენი გუნდის მთავარმა მწვრთნელმა, ვილი სანიოლმა და გურამ კაშიამ მატჩისწინა ოფიციალური პრესკონფერენცია გამართეს.
საპრესკონფერენციო ოთახში დამსწრე ნიდერლანდელი ჟურნალისტები დაინტერესდნენ ხომ არ აპირებს გურამ კაშია ერევიდიზონში დაბრუნებას. კითხვას 33 წლის ფეხბურთელმა ასე უპასუხა:
„გულახდილად გეტყვით, ამის იმედი მაქვს, მაგრამ ეს ძალიან რთული იქნება. ქვეყანაში მოქმედებს წესები, რომლის მიხედვითაც ევროპული პასპორტის გარეშე ნებისმიერ კლუბს გაუჭირდება ჩემი წაყვანა. რა თქმა უნდა მინდა დაბრუნება, მაგრამ მსოფლიოს საუკეთესო კლუბშიც მსურს თამაში, რაც ბუნებრივია არ მოხდება. რაც შეეხება ნაკრებს, იმედი მაქვს, რომ ეროვნულ გუნდში რაც შეიძლება დიდხანს ვითამაშებ, 4-5 წელი“, – განაცხადა საქართველოს ნაკრების ვიცე-კაპიტანმა.
გურამ კაშიას სათამაშო ფორმაზე მცირე კომენტარი ვილი სანიოლმაც გააკეთა:
„ტოპ-კლუბები მას უნდა დააკვირდნენ. ის ნებისმიერი გუნდისთვის კარგი შენაძენი იქნება. ხვალ ყველა ნახავს, რომ გურამი ძალიან კარგ ფორმაშია“, – აღნიშნა ჩვენი გუნდის მთავარმა მწვრთნელმა.
🇬🇪 Gaat Vitesse-icoon Guram Kashia ooit nog een comeback maken in de Eredivisie?
"Eerlijk gezegd hoop ik van wel, maar het is lastig" pic.twitter.com/nZyzPZxnOt
— ESPN NL (@ESPNnl) June 5, 2021
შეგახსენებთ, რომ ნიდერლანდებისა და საქართველოს ეროვნული ნაკრებების დაპირისპირება ხვალ, თბილისის დროით 20:00 საათზე გაიმართება.
