ბუდაპეშტში მიმდინარე წყალბურთელთა ჩემპიონთა ლიგის გათამაშების ჯგუფური ეტაპი თბილისის „დინამომ“ მარცხით და საბოლოო ჯამში ბოლო ადგილით დაასრულა.
დასკვნით დაპირისპირებაში, ქართველი წყალბურთელების მეტოქე ევროპის ერთ-ერთი უძლიერესი გუნდი და ჩემპიონთა ლიგის მოქმედი გამარჯვებული „ფერენცვაროში“ გახლდათ. უნგრული კლუბი ტიტულის შესანარჩუნებლად იბრძვის და აბა რა გასაკვირია თუ „დინამოსთან“ მატჩში აშკარა ფავორიტად მიიჩნეოდა.
სამწუხაროდ, თბილისურმა გუნდმა მეტად დასანანი მარცხი გუშინ გერმანულ „ვასპო ჰანოვერთან“ იწვნია (6:7), არადა გამარჯვების შემთხვევაში ახალი ისტორია იწერებოდა, რადგან „დინამო“ ჯგუფურ ეტაპს გადალახავდა და ფინალურ სტადიაზე ანუ საუკეთესო 8 გუნდში მოხვდებოდა.
„ფერენცვაროშთან“ კი სატურნირო თვალსაზრისით მატჩის შედეგს „დინამოსთვის“ მნიშვნელობა აღარ ჰქონდა, თუმცა გამოცდილების შეძენის მიზნით ძალზედ საჭირო იყო. სწორედ ასეთ დაპირისპირებებში იწრთობი. „დინამომ“ მრისხანე მეტოქეს ბევრი არაფერი დაუთმო, ღირსეულად ეთამაშა და საბოლოოდ 11:15 წააგო.
ამრიგად, თბილისის „დინამომ“ ჩემპიონთა ლიგის ჯგუფური ეტაპის 10 მატჩიდან 2 მოიგო და 8 წააგო. ორივე მოგება ქართულმა გუნდმა მონტენეგროულ „იანდრანთან“ მოიპოვა.
